Siusinaartumik sulisinnaajunnaarnersutisialik: Taamatut inuunissara akuerisinnaanngilara
Nuummi Katersortarfimmiit Inatsisartut tungaannut akerliussutsimik takutitsisut 25-t missaanniittut ataasinngornermi ingerlaaqatigiipput. Aqqusinikkut “naammaleqaaq”-mik suaartaannerat tusarsaavoq.
Akerliussutsimimmi takutitsisut siusinaartumik sulisinnaajunnaarnersiutisiallit ikiorsiissutinik ikippallaarujussuartunik tunineqartarsorivaat. Nunatsinni akit qaffakkaluttuinnartillugit ulluinnarni inuuniarneq ajornakusuuleriartuinnartoq, taakku isumaqarput.
Akerliussutsimik takutitsineq siusinaarluni sulisinnaajunnaarnersiuteqartuusoq Jensine Lerchimit aaqqissuunneqarpoq.
- Taamatut inuuniarneq maani sualummik meeraqarluni meerarluunniit atisarsiniutissaqanngitsoq uanga taanna akuerisinnaannginnakku.
Peqataasut ilagaat Arnánguak' K. Stork. Taanna siusinaartumik sulisinnaajunnaarnersiuteqanngikkaluarluni, siusinaartumik sulisinnaajunnaarnersiutisiallit ukiuni kingullerni 15-ini atugaat qanoq oqimaassigaluttuinnarneri isigai. Taamaammat tapersersuinini takutikkusullugu, akerliussutsimik takutitsisunut peqataassalluni aalajangerpoq.
- Inuuniarnerallu ajornartorujussuulluni, suna tamarmi akitsoraluttuinnartoq, nioqqutissat, inissiat, angalaneq. Nallinnartupilussuupput perlilertupilussuupput, Arnánguak' K. Stork oqarpoq.
Aaqqiissutissaqqissoq
Akerliussutsimik takutitsisut Inatsisartut silataanut apuummata,
Isumaginninnermut, Suliffeqarnermut, Nunamullu Namminermut Avatangiisinullu Naalakkersuisoq Bentiaraq Ottosen (A) aamma Meeqqanut, Inuusuttunut, Ilaqutariinnullu Naalakkersuisoq Mads Pedersen (IA) tummeqqanut appakaapput, akerliussutsimik takutitsisut pakatsisimanerminnik suaarutiginnikkiartornerat tusarnaariarlugit.
Bentiaraq Ottosenip pakatsinerat pillugu akissuteqarpoq, tusaanerarpai taakkualu peqatigalugit allanngueqatigerusukkini erseqqissaatigaa.
Imaaliallaannaq allannguisoqarsinnaannginneranik Mads Pedersen erseqqissaavoq. Aaqqiissutissaqqissumik iliuuseqartoqassappat, ataatsimut tamaat isigisariaqartoq, taamalilluni ikiorsiissutit allamiit allamut nuuginnarneqassanngimmata, peqataasunut oqarpoq.
