Shotokan karate: Sungiusaasoq sungiusagaalu Danmarkimi pissartanngorniutivinnermi unammisut

Ujammit tallimat Nuummeersut pissarsiaraat Shotoka karatemi Danmarkimi pissartanngorniunneq sapaatip akunnerata naanerani siuliani pimmat. Nuuk Shotokan karate-do arfineq marlunnik peqataatitsinermini tallimanik ujaminnappoq.

Shotokan karate tassaavoq periuseq karatemi periutsinit assigiinngitsunit katitigaasoq taannalu Nuummi ukiorpassuanngortuni aallunneqarpoq.

Peqatigiiffik taanna Danmarkimi ukiut ingerlaneranni pissartanngorniuttuni peqataatitaqarnermini angusarissaartarpoq. Ukioq manna aamma taamatut pisoqarpoq.

Taannaannaanngilaq. Angutit inersimasuni kumitemi tassa frikampimi unammineranni Nuuk Shotokan karate-do marlunnik finalemut annguttoqarpoq.

Taakku tassaapput Mikkel Bendixen sungiusaasualu Kasper Dyrberg.

- Ajugaanissara ilimaginngikkaluarpara. Nalunngereerpara sungiusaasunnut Kasper Dyrbergimut finale ajornakusoortussaasoq. Taava paasitinneqarpunga iliuuserisama pitsaassusaat najoqqutaralugu pointeqarnerulluta ajugaatitaasimallunga, Mikkel Bendixen KNR-imut oqarpoq.

Meeqqat pingaartinneqarput

Nuuk Shotokan karate-do-meersut iliuutsinik takutitsinermi katami aamma arlalinnik ujaminnapput. Ujammilli kisimik nuannaarutaanngillat. 

- Meeqqani inuusuttuaqqanilu peqataatitavut kata-mi ingerlalluarput assullu nuannaarutigaarput unamminerit aallarniutaasunit meerartavut ingerlaqqittarmata, Mikkel Bendixen oqarpoq.

Nuuk Shotokan karate-do timersuummi tassani Nunatsinni peqatigiiffituaavoq. Taamaattumik unamminerni Nunatta avataani pisuni peqataanissaq pingaartinneqartarpoq.

- Assorujussuaq pingaartipparput meerartatta nuannersunik misigisaqartarnissaat. Meeqqat aamma peqataatittarpagut takutinniarlugu allaneersunut unamminerni angusarissaarluta ajugaasinnaasartugut, Mikkel Bendixen oqarpoq.

Danmarkimi pissartanngorniunnerni Nuuk Shotokan karate-do ataatsimik kuultinnappoq, sølvit marluk kiisalu bronzet marluk.