Ullormut nalunaarut: Suliat nakuusermut tunngasut marluk tillinniarnerlu - innuttaasut sianigeqquneqartut

Inuit arlallit Maniitsumi pisiniarfimmut oqarasuaatinik arlalinnik unnuaq nalunaaqutaq 02.54-ip sioqqutilaaraa tillinniarput.

Taamaattumik politiit innuttaasut oqarasuaatinik tillitanik pisisuunnginniassammata, internetimi oqarasuaatinik tuniniaasoqassappat sianigeqqusipput.  

- Oqarasuaatit iPhonet Samsungillu pineqarput, sillimasut pisortaat Aqqaluk Petersen oqarpoq ilassutigalugulu, tillinniartoq aalajangersimasumik siunertaqarluni tillinniarpasittoq.

Suliat nakuusernernut tunngasut marluk - sassartitsisoqaratarsinnaasorlu

Ukiukitsoq ukiukitsoqatiminit Aasianni annersarneqarlunilu isimmittarneqarpoq. 

- Politiit pinerliisup kinaanera nalunngilaat, sillimasut pisortaat oqarpoq. 

Nukappiaqqat taakku marluk 15-ileereerput, taamaattumillu pinerliisoq unnerluutigineqarsinnaagami unnerluunneqarpoq. Pisumulli atatillugu sassartitsisoqanngilaq, nukappiararli 18-it inorlugit ukioqarmat isumaginninnermut oqartussat attavigineqarput, sillimasut pisortaat oqaluttuarpoq.

Angut alla Nuussuarmiu inooqatiminut unnuaq nakuusertoq sassartinneqaratarsinnaavoq.

- Angut pisup kingorna tigusarineqarpoq, eqqartuussivimmullu sassartinneqassanersoq ullup ingerlanerani nalilersorneqassaaq, sillimasut pisortaat oqarpoq.

Sillimasut pisortaat naggasiilluni oqaluttuarpoq, angut 32-nik ukiulik Nuummi sisamanngornermi pineqaatissinneqarsimasunut inissiisarfimmit qimaasimasoq politiinit suli ujaarineqartoq.

Angut takusimagukku sumiinneranilluunniit ilisimasaqaruit 701448-mut sianernissat kajumissaarutigineqarpoq.