Spiralilersuisimanermut taarsiiffigineqarnissamik 100-t missaanniittut sapaatit akunneri marluk ingerlaneranni qinnuteqarsimasut
Kalaallit arnat 1991 ilanngullugu akuersiteqqaarnagit spiralilerneqarsimasut taarsiiffigineqarnissamut juulip aallaqqaataanit qinnuteqarsinnaalerput, amerlasuullu tamanna atorsimavaat.
Arnat 93-it 300.000 koruuninik taarsiiffigineqarnissamik sapaatit akunnerini marlunni qinnuteqarsimapput.
Tamanna Patienterstatningip kisitsisaataani takuneqarsinnaasoq, Berlingske allappoq.
Qinnuteqaatit amerlanersaanni oqaluttuat sukumiisut ilanngunneqarsimasut, patienterstatningimi pisortaq Karen-Inger Bast Berlingskemut oqarpoq
Tamanna oqartussanut qinnuteqaatit nalilersorneranni iluaqutaassaaq.
Qinnuteqarnissamut periarfissaq juulip aallaqqaataani ammarneqarpoq, 2028-milu septembarip aallaqqaataata tungaanut atuutissalluni.
Taarsiiffigineqarnissamut periarfissaq, kalaallit arnartaannut 1991 ilanngullugu akuersiteqqaarnagit spiralilerneqarsimasunut atuuppoq.
Septembarip aallaqqaataa naatsorsuutaasoq
Qinnuteqaatit Patienterstatningimut nassiunneqassapput, arnamullu ataatsimut taarsiissut 300.000 koruuniuvoq.
Taamaattorli Patienterstatningip qinnuteqaatit aatsaat inatsisissaq atuutilerpat suliarisinnaavai.
Danmarkimi peqqinnermut ilageeqarnermullu ministeri Ida Auken (Socialdemokratietineersoq) taarsiiffigineqarnissamut inatsisissatut siunnersuut juunip ulluisa 25-anni saqqummiuppaa.
Inatsisissatut siunnersuut siusinnerusukkut saqqummiunneqartussaagaluarpoq, qinersisoqarnissaali naalakkersuisoqatigiinnillu isumaqatigiinniarnerit pissutigalugit kinguaattoorpoq.
Inatsisip septembarip aallaqqaataani 2026-mi atuutilernissaa naatsorsuutigineqartoq, Patienterstatningip juulip aallaqqaataani ilisimatitsissutigaa.
Kalaallit arnat niviarsiaqqallu 1960-ikkut aallartinneranni naartunaveersaatinik spiralilerneqarsimasut, arlallit akuersiteqqaarnagit taamaaliorfigineqarsimanertik pillugu oqaluttuarisimasaat, Spiralilersuisimaneq pillugu suliami pineqarput.
Naalakkersuisut siulittaasuat Jens-Frederik Nielsen (D) Danmarkimillu ministeriunera Mette Frederiksen (Socialdemokratiet) ukioq kingulleq suliami utoqqatserput.
Utoqqatserneq nunatsinni peqqinnissaqarfiup Danmarkimit akisussaaffigineqarnerani, kingornalu nunatta akisussaaffigilernerata kingorna aamma spiralilersuisoqarsimaneranik pissuteqarpoq.
