Sisoraaserluni ooqattaasarneq: Sondre Slettemark marloriarluni nunani tamalaani inuusuttuaqqat unammineranni ajugaavoq
20-nik ukiulik Sondre Slettemark inuusuttuaqqat unamminerini marlunni sisoraaserluni ooqataasarluni sapaatip akunnerata naanerani ajugaavoq IBU junior Cupimi Polenimi unammisoqarmat.
Ajugaaneq siulleq pivoq arfininngormat januarip 18-at ataatsikkut aallarnermi 59-nik peqataasoqartumi.
Sapaatiummat aamma taama ingerlalluartigaluni Sondre Slettemark ajugaaqqippoq naatsumut 10 kilometerimut unamminermi 114-nik peqataasoqartumi. Tassani nunarsuarmi pissartaasoq Matija Legovic unammeqataavoq.
- Pikkunarluinnarpoq. Ukiumi unammiffiusumi maanna ingerlasumi aatsaat taama unammilluartigaanga, Sondre Slettemark KNR-mut oqarpoq.
Eqqamaneqaatissat periarfissaapput
Sapaammi naatsumut 10 kilometerimut unamminermi ataasiarluni ajorarpoq aamma arfininngornermi 12 kilometerimut unamminermi marloriarluni uniorluni. Taamaattoq illinertigut sisorarluarami marloriarluni ajugaavoq.
- Sisoranermi aatsaat taama timikkut pitsaatigivuunga. Misigisimavunga qummukajaatigut timmisuusiinnartarlunga. Naatsumut unamminermi siuliani seqqorluarpallaanngilanga tamannali tassa ataatsikkut aallarnermi naatsumullu unamminermi iluarsivara, Sondre Slettemark oqaluttuarpoq.
Inuusuttuaqqatut unammisartuunermini ukioq manna naggataarami inuusuttuaqqat unammineri aallunneruai unamminissarlu annertooq tulleq Tysklandimi pissaaq Europami pissartanngorniuttuni peqataassagami.
- Nuannissaqaaq aammalu pissartanngorniunnerulluni, tassanilu ujamminik eqqaamaneqaatissanillu angusaqartoqarsinnaavoq. Sisorarlunga ingerlalluataarsinnaaguma seqqorluarlungalu Tysklandimi angusarissaarsinnaavunga, Sondre Slettemark oqarpoq.
