Siunnersortip sulerisimanera nalornissutigineqartoq

Siumumit qinigaasimasup, Lars-Emil Johansenip aamma kommunimi pisortaanerusimasup Lars Møller-Sørensenip peqquserluuteqarsimasutut unnerluutigineqarnerani eqqartuussivimmi suliaqarnermi marlunngornermi ilisimannittunik nassuiaateqartoqarpoq.

Inuit qulingiluanit ikinnerunngitsut eqqartuussivimmi inimi ilisimannittutut nassuiaateqarput. Illersuisullu unnerluussisussaatitaasullu politikeriusimasunik kommunimi avataanit siunnersorteqartarneq nalinginnaasuunersoq ullumi ukkatarivaat.

Apeqqullu taanna borgmesteriusimasup nassuiaateqarfigaa:

- Politikeriusimasumik siunnersortitut atorfinitsitsisarnermik misilittagaqanngilanga, taanna oqarpoq.

Taassumali siunnersortinut isumaqatigiissuteqarnermi isumaqatigiissutit tamarmik takuneq ajorlugit aamma oqaatigaa.

Ilisimannittutut nassuiaateqartoq alla – aamma borgmesteriusimasoq Lars-Emil Johansenip aamma Lars Møller-Sørensenip akornanni isumaqatigiissut kommunimi pisortaanerup soraarnerata kingorna allaffigisimasaani nassaarineqartoq oqaatigaa.

- Lars-Emil Johansenip aamma Lars Møller-Sørensenip akornanni isumaqatigiissut kommunalbestyrelse avaqqullugu isumaqatigiissutaasimasoq kommunimit 2021-mi paasineqarpoq, ilisimannittutut nassuiaateqartoq oqarpoq.

Isumaqatigiissulli kimit nassaarineqarsimanersoq allaffimmilu kina torersaaqataasimanersoq ilisimannittutut nassuiaateqartunit ilisimaneqanngilaq. Taakkulu marluullutik torersaaqataasimanatik erseqqissaatigaat.

Nammineq kajumissutsimik suliaqarneq pineqarsinnaagunartoq

Borgmesteriusimasut aappaata Lars-Emil Johansen kommunimi arlaleriarluni takusimallugu eqqartuussivimmi oqaatigaa.

Lars-Emil Johansen sulerinersoq Lars Møller-Sørensen aperaajuk?

- Aap, tamannalu Tasiilami Kofoeds Skolemut attuumassuteqarnerarpaa.

Kofoeds Skolemi sumut tunngassuteqarnersoq apeqqutigaajuk?

- Naamik, pisortaanermi tatigaara.

Lars-Emil Johansenip suna suliarineraa nalornissutigineqartoq ilisimannittutut nassuiaateqartut marluk eqqartuussinerup nalaani oqaatigaat, taamaammat taanna kommunimi pisortaanermut tullersortip, Lars Møller-Sørensen taarsermagu soraarsinneqarpoq.

- Lars-Emil Johansen Lars Møller-Sørensenimut suna suliarisimaneraa naluara.

- Immaqa Kofoeds Skolemi nammineq kajumissutsimik suliarneq, kommunimmi NGO-nik suleqateqartarnera nalinginnaasorujussuuvoq, pisortaanermut tullersorti eqqartuussivimmi oqarpoq.

Aalajangersimasumik akissarsiaqarluni siunnersortaasoqarsinnaava?

Avataanit siunnersortit aalajangersimasumik qaammammut akissarsiaqartoqarsinnaanersoq unnerluussisussaatitaasup ullumikkut aamma apeqqutigaa.

- Siunnersortit akiligassaliortarput, aalajangersimasumik akissarsiaqartoqassagaangat kommunalbestyrelsip akuersissuteqarnissaa pisariaqarpoq, ilisimannittutut nassuiaateqartoq oqarpoq.

- Avataanit siunnersortit pineqartillugit taama aalajangersimasumik akissarsiaqartumik ilisimasaqanngilanga, ilisimannittutut nassuiaateqartoq oqarpoq.

Angulli isumaqatigiissusiortup nassuiaateqarnera naapertorlugu, Lars Møller-Sørensenip inuup ataatsip suliffeqarfiutaa pineqartillugu taama iliortoqarsinnaasoq nassuiaatigisimavaa.

- Kommuneqarfik Sermersuumi inuup ataatsip suliffeqarfiutaanut atatillugu akileraarutissat naatsorsorneqarnissaannik qulakkeerinissaq pillugu akissarsianut aaqqiissuteqartoqartarpoq. Tamannalu amerlasoorpassuarni atorneqarsimavoq, taanna oqarpoq.

Pingasunngorneq eqqartuussinerup ulluanni kingulliussasoq

Isumaqatigiissummili Lars-Emil Johansenip kommunimut suliassai suunersut allassimanngitsoq erseqqissaatigineqarpoq.

Ilisimannittutut nassuiaateqartoqarnerani aqagu ulloq kingulliussaaq illersuisullu marluk eqqartuussiviup suliami uppernarsaatinik naliliinnginnerani naggasiutitut oqaaseqassapput. Eqqartuussisoq eqqartuusseqataasullu marluk aalajangiinissamut piffissaq qanoq sivisutigisoq atussaneraat ilisimaneqanngilaq.

Sapaatilli akunnerata naannginnerani eqqartuussuteqartoqarnissaa naatsorsuutigineqarpoq.