Siullerpaamik Avannaa Arctic Gamesertoqarnera iluatsilluartoq

Avannaa Arctic Gamesip Ilulissani aaqqissuunneqarnera ukiut arlallit matuma siorna arnat nunarsuarmi pissartanngorniuteqataasussanngornerani isiginnaartoqarneranit amerlanerusut angerlarsimaffimminnit isiginnaarput.

Februaarip arfineq-sisamaanit 13-iata tungaanut Avannaa Arctic Gamesertoqarpoq, unammeqataasullu inuusuttuaqqat inuusuttullu periutsini assigiinngitsuni 13-ini unammipput. Avannaata Kommunia tusagassiuutinut nalunaarummi allappoq.

Unammisitsisoqarnera ukiut pingasut sioqqullugu ataqatigiissaarneqalerpoq, taamaammallu Avannaa Arctic Gamesimi pingaarnertut ataqatigiissaarisoq, Riikki Jensen unammisoqarneranit ullualuit qaangiuttut nuannaarpoq.

- Issittumi naggueqatitsinni katerinneq immikkuullarippoq, nunap inoqqaavisa timersuutaata ataatsimoortimmatigut, qilanaalereerpugullu 2027-mi Avannaa Arctic Games ingerlateqqinnissaanut, taanna tusagassiuutinut nalunaarummi oqarpoq.

Unamminermi ileqqorissaarnerpaaq

Periutsini unamminerit tamarmik naammassimmata pointit kisinneqarput, Team Nunapkullu unamminerni 297-inik pointeqarluni nunani ajugaasuuvoq, nunanillu tamanit ileqqorissaarnerpaamik aamma toqqaasoqarpoq.

Nunatsinnit Majka Qvist ileqqorissaarnerpaatut toqqarneqarpoq.

Kalaallit Nunaat 221-nik pointeqarluni – tassa Team Nunapkumit 76 pointinik pointikinnerulluni nunani pointeqarnerpaani tulliuvoq.

Lars Muumu Jerimiassen Team Kalaallit Nunaannit inuusuttuaqqani pointeqarnerpaavoq, angutinilu inuusuttuni Edvard Kruse aamma nunatsinneersoq Team Nunapkumeersoq Colton Paul pointeqatigalugu pointeqarnerpaallutik.