Siulersuisuni ilaasortanik taarsersuinerit isornartorsiorneqarpoq

Naalakkersuisut Namminersorlutik Oqartussat suliffeqarfiutaasa siulersuisuini ilaasortanik taarsersuineranni, arnat angutillu amerlassutsimikkut naligiinnerulernissaat pingaartinneqarpoq, soorlu aamma ilaasortat ataasiakkaat piginnaasaat pingaartinneqartoq. Taamali eqqarsarneq isornartorsiorneqarpoq.
Allattoq Mads Lynge
juunip 02-at 2014 08:14

Arnat angutillu siulersuisuni amerlassutsimikkut naligiinnerulernissaat pingaarnerutikkaanni, inuiaqatigiit aningaasarsiornerat ataatsimut isigalugu eqqorneqarsinnaasoq, isornartorsiuisut, aviisimut Jyllands-Postenimut ilaatigut oqarput:

- Suliffeqarfiupput, Kalaallit Nunaata aningaasarsiorneranut pingaarutilerujussuit, lektori Lise Lyck, CBS-imi immikkoortortami pisortaq, Jyllands-Postenimut oqarpoq.

Kalaallit Nunaata siunissami uuliasiorsinnaanissamut aatsitassarsiorsinnaanissaminullu nunanit allanit ukiuni makkunani aningaasaliisussarsiornera, taassuma eqqaasitsissutigaa.

- Namminersorlutik Oqartussani siulersuisuni ilaasortat allanngortiteraanni, inuiaqatigiit aningaasarsiornerannik eqquisoqarsinnaavoq, tamannalu navianaateqarsinnaavoq - pingaartumik ukiuni makkunani, Lise Lyck oqarpoq.

Taanna Aarhus Universitetimi lektorimit, oqaluttuarisaanermillu ilisimatusarsimasumit, Michael Böss-imit taperserneqarpoq. Taassuma Kalaallit Nunaat immikkut aamma sammisarivaa.

- Siulersuisuni ilaasortat nuimanerit ilaasa taarsersorneqarnerat inuiaqatigiinni ilaatigut aalassassutigineqarsimavoq, Michael Böss, Jyllands-Postenimut oqarpoq.

Siulersuisuni ilaasortat ilaatigut misilittagakittuunerat isornartorsiuisut tikkuartortarsimagaat, taassuma maluginiarsimavaa. Arnat ilaasortanngortut ilaat, angutillumi aamma, siulersuisuni suliaqarnermik misilittagakinnerat, Michael Bössip aamma tikkuarlugu isornartorsiorpaa.

Aamma atuaruk