Sisa Pension Polar Seafoodimi piginneqataalersoq: - Piginneqataalerneq piginnittunik oqaluttuarisaanermi aatsaat nikiffiusoq
Polar Seafoodip ingerlatseqatigiiffik ammarpaa. Tamanna Sisa Pensionip suliffeqarfiup aktiaataannit 5 procentimik ullumimiit piginnittuulerneratigut pivoq.
Polar Seafoodimi avataaneersumik aatsaat siullermeersumik piginneqataasoqalerpoq.
Illuatungeriit piginneqatigiinnermi aaqqissuussaanerup nutaap suliffissat tunitsivissamullu periarfissat qulakkeerai ataatsimut tusagassiuutinut nalunaaruteqarnerminni allappaat.
Polar Seafoodimi pisortap, Bent Sallingip suleqatigiinneq nutaaq nuannaarutiginerarpaa – tamannalu aalisarnermut inatsimmut ilaatigut attuumassuteqarnerarlugu.
- Aalisarnermut inatsit nutaaq ilungersuullugulu pimoorupparput, SISA-millu piginneqateqalernerup nassataanik ataatsimoorluta nunatsinni pisuussutitta suli amerlanernit iluaqutigineqalernissaannut aqqutissiueqataavugut, pisortaq tusagassiuutinut nalunaarummi allappoq.
Aalisarnermut inatsimmi Polar Seafoodip nunatta kitaani raajartassiissuteqarfigineqarnissaani 20 procentimik appaanissaq siunertaasoq, Bent Sallingip siorna oqaatigaa.
Tamannalu piginneqataassutsit, pisassat tamakkiisut (TAC) 8 procentiisa nalingata missaanik tunisisariaqalernerannik kinguneqassaaq.
- Polar Seafoodip angivallaalersimanerannik isumaqartoqarpat paasisinnaavarput. Kisianni taava suliffiit nunatsinniittut attavaartissinnaananavianngilagut. Tamannalu kommuninut aalisakkeriveqarfigisatsinnut annertuumik kinguneqassaaq, pisortaq taama oqarpoq.
Aningaasaliingaatsiarneq
Sisa Pensionip nammineq oqarnera naapertorlugu 44.000-inik ilaasortaqartup piginneqataalerneq soraarnerussutisiaqalernissamut aningaasaateqarfimminnut pingaaruteqartuunerarpaa.
- Piginneqatigiiffiup maannamut ilaqutariinnit marlunnit pigineqartup piginnittuinik allannguineq, inuiaqatigiinni piujuartitsineq tunngavigalugu ingerlatsinerup aammalu aningaasaqarnerup nukittorsarneranut sunniuteqassaaq, tusagassiuutinut nalunaarummi allassimavoq.
Sisa Pensionimi pisortap, Søren Schock Petersenip aningaasaliineq imaaliallaannaq pinngitsoq ilisimatitsissutigaa.
- Aningaasaliinissamik aalajangerneq Polar Seafood Greenland A/S-ip sukumiilluinnartumik misissuiffigereerneratigut pivoq, iluanaarutissatullu naatsorsuutigisat eqqarsaatigalugit tamanna aningaasaliinerup aarlerinaateqarsinnaaneranut naapertuuttoq SISA-mit nalilerneqarpoq, Søren Schock Petersen tusagassiuutinut nalunaarummi allappoq.
Sisa Pensionip siulersuisuisa siulittaasuata, Jess G. Berthelsenip piginneqataalerneq iluanaarutissaannarnut tunngannginnerarpaa.
- SISAmi aningaasaliinerup iluanaarutissartai kisiisa eqqarsaatiginagit – nunatsinni suliffeqarfiit qulakkeernissaat aammalu nunatsinni inuussutissarsiutit pingaarnersaata nukittorsarnissaa kiisalu ilaasortatsinnut piginneqataatitsinissaq periarfissikkumavarput. Polar Seafood Greenland A/S nunatsinni aalisarnermi annertuumik pingaarutilittut inissisimavoq, suliffeqarfiullu taassuma suli ineriartortuarnissaanut suleqataasinnaanerput tulluusimaarutigaarput, taanna tusagassiuutinut nalunaarummi paasissutissiivoq.
