Sinerissami radioqarfik Aasiaat Radio attaveqaleqqippoq

Nutarterneqarpoq : nal. 10:55

Aasiaat Radio maanna attaveqaqqilersimasoq Tusassip nalunaarutigaa. Attaveqarnermut atortulersuut ajortoortoq taarserneqareersimasoq, tamatumalu kingorna attaveqaatit aaqqinneqareersimasut, Tusassip tusagassiuutinut nalunaarutaani allassimavoq.

Siusinnerusukkut allaatigaarput:

Aasiaat Radio nassaariarniaraanni siorsuppaluk kisimi tusaaneqassaaq – sinerissamut radioqarfiiup attaveerunnera tamassumunnga peqqutaavoq. 
Tusassip nittartagaani paasissutissat naapertorlugit makku takuneqarsinnaapput:

-Aasiaat Radio radionut tamanut attaveeruppoq. Ajoqutaa misissorneqarpoq.

Aasiaat Radio tassaavoq Kalaallit Nunaanni imarsiornermi pinartoqartillugu kiisalu isumannaallisaanermut suliaqarnermut pingaaruteqartoq.

Maannakkut aamma attaveqaatit allat – soorlu interneti, mobilikkut attaveqaatit, TV aammalu FM-radio – ajoquteqalernikuupput. Taakkuli attaveerussimanngillat, kisianni sumiiffinni ataasiakkaani teknikkikkut ajornartoortoqarnera malugineqarsinnaassaaq.

Tusassip KNR-mut allakkatigut akissuteqarnermini nalunaarutigaa ajornartorsiutip Aasianni routerimik ajortoorneranik pissuteqartoq. Tamanna peqqutaalluni Aasiaat Radiop sinerissamut attaveeruttoornera aallartippoq. Ajornartorsiut maanna suliarineqarpoq, ullup qeqqata missaani attaveqaatit aaqqeqqinnissaat, Tusassimiit naatsorsuutigineqarpoq.

Ajornartorsiut annertuunik sunniuteqarsimasoq, tamatuma saniatigut nalunaarutigineqarpoq: – tassami Aasiaat Radio kisimi eqqugaasimanngilaq, aammali Aasianni eqqaanilu attaveqatigiinnermi aqqutit allat aamma ajoquteqarnerannik imaluunniit kigaatsumik ingerlasarnerannik kinguneqarsimavoq.

KNR-i ingerlaavartumik malinnaassaaq – Tusassillu nittartagaani aamma paasissutissanik ingerlaavartumik malinnaasinnaavutit.