Sikaavik innaallagiaqarfik ataasinngornermi unnukkut ikuallattoq

Nuummi Blok 4-ami ataasinngornermi unnukkut ikuallattoqalermat qatserisartut politiillu takkupput. 

Sikaavik innaallagiaqarfik ikuallalersimagaluartoq, nunatsinni politiit pigaartut pisortaata Annette Ostenfeldtip oqaatigaa. 

Ikuallanneq siaruartinnagu qamisarneqapallammat ajoqusertoqanngitsoq, upalungaarsimanermi pisortap tullersortaata Jens Mikkelsenip oqaatigaa. 

- Eqqaani najugallit qimagussortinneqarput, inissiamilu ataatsimi najugallit minillugit ippassaq unnukkut angerlaqqipput, Jens Mikkelsen oqarpoq.

Nammineq qamisaanasi

Sikaavik innaallagiaqarfik pujuliulermat najugallit qimagussortinneqarput, pujorlu aamma peqqutigalugu inissiami ataatsimi najugallit ippassaq unnukkut angerlaqqissinnaasimanngillat. 

Sikaavimmi innaallagiaqarfimmi ikuallanneq qanoq aallartissimanersoq qatserisartut ilisimanngilaat, susoqarsimaneralu Nukissiorfinni teknikerit misissuleruttorpaat. 

- Ikuallannerup annertuutut isigineqarnera tupinnanngilaq, sikaaviimmi innaallagiaqarfiit ikuallaleraangamik qaartarput. Taamaammallu taamaattuni ikuallattoqartillugu nammineq qamisaasoqartassanngilaq. Aalajangersimasumimmi periuseqarluni taamaattut qamisarneqartarput, qatserisartunillu kalerrinnissaaq iliuusissatuaasarpoq, upalungaarsimasut pisortaata tullersortaa oqarpoq. 

Ikuallanneq qaminniarlugu CO2-mik qamitsissut, qamisaallu sequtsilasoq atorlugu qatserisartut qamisaapput. Taakku arlaat pigigaanni qamisaasoqarsinnaavoq. Sikaavimmili innaallagiaqarfimmi ikuallanneq imermik qamisarneqassangilluinnarpoq, upalungaarsimasut pisortaata tullersortaa naqissusiivoq.