Sermersuup iluani tupinnartorpassuit
Amerikami avataarsuanik misissiuisoqarfiup Nasap Avannaata Sermersua Petermann gletsjerip eqqaaniittoq qulaallugu radarimik misissuinermut atatillugu sermit napasorpassuit Sermersuup iluaniittut radari atorlugu nassaarisimavaat.
Ilisimatuut misissuinerminni angusaat atuagassiami Nature Geosciencemi saqqummiunneqaqqammerput, kingornalu nunarsuarlu tamakkerlugu tusagassiuutinit sammineqarlutik.
Taakku Sermersuup iluani kilometerip aappaa avillugu ititigisumiipput sermillu aasinnarluni qereqqinneratigut pinngorsimagunarlutik. Assilineqartut Sermersuup silap pissusiata allanngoriartorneranit qanoq sunnerneqarnerannik paasissutissanik nutaanik pissarsiffigineqarsinnaanissaat ilisimatuut tikkuarpaat.
- Sermeq aassinnarluni qereqqikkaangat sermeq qaffakkiartorlunilu equsaartarsimassasoq ilimagaarput, taamaalilluni sermip qaatungaa kissatsittarsimassavaa aqiliortillugulu, taamaalillunilu ingerlaartarsimassalluni, nalunaarusiortut siuttuat Robin Bell, Columbia Universitymeersoq tuluit aviisiannut The Guardianimut taama oqaluttuarpoq.
Napasorsuit Sermersuup iluaniittut qaqqaanasorineqartarsimagaluarput, maannali paasisat nutaat takutippaat sermiusut.
Sermit napasorsuit ilaat kiilometeri ataatsip tungaanut portutigipput.