Sara Folketingimi: Aatsitassat inituallaaqaat

Naalagaaffeqatigiinnermi periarfissat unammilligassallu Folketingimi massakkut oqallisigineqarput. Siumumeersoq Doris Jakobsen  aamma Inuit Ataqatigiinneersoq Sara Olsvig oqallinermi peqaatassapput.
 
Taakkualu oqaluttarfimmiit oqaasissaat misissuataarpagut.
 
- Nunarput Danmarkimi oqallissutigineqartillugu, aatsitassarsiornikkut siunissami piukkoorutit ullumikkut aningaasarsiornikkut Nunatsinni sunniukinnerannut sanilliullugit inituallaaqaat. Folketingimi ilaasortaq Sara Olsvig oqaluttarfimmiit oqaasissaminik allappoq.
 
Piuviusorli tassaavoq, Nunatsinni aatsitassat oqaluuserinnissamik soqutigisaqartut, Danmarkimi isummernissamut sunniuteqartartuinnaanngimmata. Aammami Sara Olsvig Doris Jakobsenilu soqutiginnipput.
 
Tassami taakkua ullumi tikkuarpat, aatsitassat suut piiaarniarnerlugit aaliangiiniarnitsinnit Danmark ningorsimaartariaqartoq.
 
Uranimik nunani tamalaani saruarterineq akerlilersorneqassasoq, Danmarkimi pisortatigoortumik politikkiuvoq. Kisianni tamatuminnga Nunatta atuisinnaanera piiaasinnaaneraluunniit Danmarkip killilersussappagu, namminersorneq pillugu inatsimmut naapertuutissanngitsoq, Doris Jakobsen oqarpoq.
 
- Aatsitassarsiornermik aallartitsinissaq pisariaqarteqisarput akornusersorneqarmat, Naalagaaffeqatigiinnermut ajornartorsiutavoq, Siumumeersoq allappoq. Ilanngullugulu oqarpoq, Nunatsinni aatsitassarsiornikkut piukkoorutigut qallunaat nunalluunniit avannarlermiut aningaasaliissutaannit aningaasalersorneqarnissaat, nammineq partiimi iluarissaqimmagu.
 
Aalisarnermut politikki aamma Doris Jakobsenip Sara Olsvigillu Folketingimi oqaluttargimmmiit sammivaat. Sara Olsvigip avaleraasartoorniarnermi pisinnaatitaaffiit ujartorpai:
 
- Nunatta avaleraasartoortassinneqarnissaa anguniarlugu Statsministeri nunani tamalaani isumaqatigiinniarnerni qanoq iliuuseqarpa?
Nunatta alisagartassatigut pisinnaatitaaffii eqqarsaatigalugit, naalagaaffeqatigiinermi unamminartoqarpoq.
 
Doris Jakobsenip tikkuarpaa, Naalagaaffeqatigiinni aalisarnermut piniarnermullu politikkimut Danmarkip EU-mut ilaasortanera, annermik ajornartorsiutaasoq.
 
Inatsisitigut ataataqanngitsut piffissami kingullermi oqallinermi initupput. Kisianni Doris Jakobsenip oqalugiaaatata naggataani aatsaat taanna tikinneqarpoq, Sara Olsvigipoqalugiaataata qiterpaarneraniilluni. Taamaannera apeqqummi tassani danskit politikeriisa mikisinneqarsinnaanerannik neriuuteqangaarnerannik ersersitsinngilaq.