SAR-imik suliaq unitsinneqartoq - angutit inuusuttut marluk suli nassaarineqanngillat

SAR-imik suliap pingasunngormalli aallartinneqartup unitsinneqarnissaa Kalaallit Nunaanni Politiit Issittumilu Sakkutooqarfiup nalunaarutigaat.

Kalaallit Nunaanni Politiit tusagassiuutinut arfininngornermi unnukkut taama nalunaaruteqarput.

Angutit inuusuttut pingasut Paamiut Narsallu akornanni tuttunniarniarlutik sapaatit akunnerata siuliata naanerani aallarput, pingasunngornermiillu ujaarineqalerlutik.

Angut inuusuttoq ataaseq Sermiligaarsummi illuaqqamiittoq ajunngitsoq umiatsiartunit allanit pingasunngornermi unnukkut nassaarineqarpoq. Angutit inuusuttut marluk allat suli nassaarineqanngillat.

- Periarfissaasinnaasut tamaasa atorlugit SAR-imik suliaqarpugut, immakkut silaannakkullu ujaasilluta. Sineriammi ajornakusoortumi ullualunni ujaasinerput ajoraluartumik kinguneqanngilaq, ujaasinerullu unitsinneqarnissaa aalajangertariaqarsimallugu, vicepolitiinspektøri Allan Bredahl tusagassiuutinut nalunaarummi oqarpoq.

Kalaallit Nunaanni Politiit naapertorlugit ujaasineq sakkortusimaqaaq, Paamiuniillu kujammut sineriak annertungaatsiartoq ujaasiffiulluni. SAR-imut qulimiguulik minneq, SAR-imullu qulimiguulik angisooq Kangerlussuarmiit ujaaseqataajartortoq politiit sisamanngormat nalunaarutigaat.

Angutit pingasut angalanermi nalaani sikumut aporsimasut Kalaallit Nunaanni Politiit aamma uppernarsarpaat.