Sakkutuut Narsarsuarmi annerusumik sungiusartussanngortut
Allaaserisaq Issittumi Sakkutooqarfiup akissutaa tallimanngornermi ullaakkut ilanngunneqarneratigut nutarterneqarpoq.
Nalinginnaasumik Narsarsuarmi talittarfik nipaattarpoq.
Mittarfimmiilli timmisartup kingulliup apriilimi qangattarnerata kingorna, Narsarsuarmi talittarfik nalinginnaasumik nipaappoq.
Sakkutuut aalisartoq ataaseq talittarfimmiittoq pingasunngornermi ullaakkut tikiffigaat. Umiatsiat targat marluk sakkutuut 17-it politiillu marluk Narsarsuarmukaannissaannut attartorneqarput.
Issittumi Sakkutooqarfik naapertorlugu sakkutuut kingusinnerusukkut sungiusartoqarnissaq sioqqullugu sumiiffimmik takuniaassapput.
- Nunap assinga atorluarneqassaaq kujataanilu pinngortitaq ullumimiit sisamanngornermut takuniaaffigineqarluni.
Sakkutuut septembarimi annerusumik sungiusarnissaat pillugu sakkutuullu hotelimi najugaqarnissaat pillugu nunaqarfimmi oqaluttoqangaatsiarsimavoq.
Sakkutuut septembarimi sungiusarnissaminnut piareersarnissartik pillugu talittarfimmiinnerminni oqalupput.
Amerikamiulli Narsarsuaq sakkutooqarfigissallugu piukkuulereernerisa kingorna siunissami Narsarsuup qanoq iliuuseqarfigineqarnissaa suli ilisimaneqanngilaq
Narsarsuup siunissaa pillugu suliap USA-p, nunatta Danmarkillu akornanni isumaqatigiinniarnerit naammassinngippata aalajangerneqarsinnaannginnera pillugu Kommune Kujallermi borgmesterip Malene Vahlip KNR-imut oqaatigaa.
Septembarimi sungiusarnissaq kommunimit Namminersorlutillu Oqartussaniit aaqqissuunneqarpoq.
- Sungiusarnissat tamarmik Kommune Kujalleq Namminersorlutillu Oqartussat qanimut aaqqissueqatiginerisigut pilersaarusiorneqarpoq, Issittumi Sakkutooqarfik allappoq.
Sakkutuut takornartat
Sakkutuut takornariatulli allatut isikkoqarput Narsarsuarmut soorlu tikeraaginnartut.
Sakkutuutut atisaqaraluarput pinngortitarli assilisaqattaarpaat immiussillutillu.
- Argentinap qalipaatai tamaani takussaapput - taamaattumik naatsorsuutiginnittorujussuuvunga, sakkutuut ilaat Englandip Argentinallu nunarsuarmi pissartanngorniuunnermi unamminissaat, pingasunngornermi unnukkut pisussaq, pillugu oqarpoq.
Franskit sakkutuui marluk iluliaminersuit angisuut, sermersuarmit ungasinngitsumiittumit kangerlummut nakkaasut, assilineqaqattaarneranni pujortarput
Narsarsuullu umiarsualiviani norskisut svenskisullu aamma oqaluttoqarpoq.
Sakkutuut pilersaarusiortullu Issittumi Sakkutooqarfimmeersut nunat iligisat arlallit peqatigalugit ukioq manna kingusinnerusukkut sungiusartoqalinnginnerani misissueqqaarput, Issittumi Sakkutooqarfik Facebookikkut allappoq.
Sakkutuut ilaat Issittumi Sakkutooqarfimmeersup Narsarsuup umiarsualivianiittup timmisartumik Qaqortumit sisamanngornermi siusinnerulaartukkut timmisartuussinissamik ataqatigiissaarivoq.
- Qanoq tamaaniissinnaanerput pillugu erseqqissunik malittarisassaliornikuuvugut, sakkutuut ilaat alla Narsarsuarmi takornarialerisumut oqarpoq.
Amerikamiut sungiusarnerillu
Narsarsuarmi najugallit Issittumi Sakkutooqarfiup sakkutuullu nunanit tamalaaneersut sooq sungiusarniarnersut eqqoriarusuppallaanngilaat.
Amerikamiut nunaqarfimmut misissuiartorlutik ukioq manna siusinnerusukkut marloriarlutik Narsarsuarmiissimanerat siornatigut allaaserineqareerpoq.
Narsarsuarmiut ilaat KNR-imut oqaluttuarpoq, taakkua umiarsualivimmi, mittarfimmi akunnittarfimmilu maanna atorunnaareersumi pissutsit misissorsimagaat.
- Narsarsuaq sungiusarfissatsialaavoq, tamaani sammisaqartitsinerit piniariartarfinnut piffissami piniarfiusumi sunniuteqaqataannginnerunissaat ilaatigut pissutigalugu, Issittumi Sakkutooqarfik allappoq.
Sungiusarneq Natomit sungiusaanerunersoq sakkutuullu sooq Narsarsuarmiissanersut KNR-ip Issittumi Sakkutooqarfimmut apeqqutigaa. Issittumi Sakkutooqarfik akivoq, sungiusarneq illersornissaqarfiup suliniutaasa, Arctic Endurance-mik taaneqartup ukioq manna januaarimi aallartittup ilagigaa.
- Arctic Endurance Natop suliniutaanut Arctic Sentry-mik taaneqartartup ilagaa, Issittumi Sakkutooqarfiup allakkatigut akissutigaa.
