Tusagassiuut: Sakkutuut issittumi umiarsuaat aserfallassimasut NATO’p piumasaqaataanik naammassinninngillat

Sakkutuut issittumi umiarsuaat Thetisimik pitsaassusillit NATO’p ataatsimut illersuineranut iluaqutaasinnaasut Danmark neriorsuivoq. DR’ili malillugu umiarsuit minnerpaamik piumasaqaatinik naammassinninngillat.

Allattoq Thor Bill

novembarip 29-at 2023 14:16

Nutserisoq Paornánguak Kleist

Sakkutuut sorsuuteerarujussui sisamat Thetis, Triton, Vædderen aamma Hvidbjørnen Kalaallit Nunaata imartaani issittumi nalinginnaasumik ingerlaartartut pisariaqartinneqalissappat NATO’p ataatsimut illersuinissaanut ilaasinnaasussaapput.

Ataatsimut illersueqatigiinnermut iluaqutigineqartussat ilaattut Danmarkimit tamanna neriorsuutigineqarsimavoq.

Umiarsuilli sorsuuteeqqat ukiunit 30-nit sivisunerusumik atorneqarsimasut ima aserfallatsigalutillu ajortissimatigipput NATO’p minnerpaamik piumasaqaataanik naammassinnissinnaanatik.

Taama DR allappoq.

Taamannak ilaatigut naliliivoq Niels Wang, kontreadmiraliusimasoq Sakkutuunilu imarsiortuni 2005-2010-mi pisortaasimasoq.

- Thetisimik pitsaassusillit Natop umiarsuarnut sorsuutinut piumasaqaataanik qanoq naammassinnaassanersut takujuminaatseqaara. Sipaarniarluni systemit, sakkut maluginiutillu nukittussutsimut uuttuutinut atatillugu sapinngilluarsimaneranut atortuusimasut tamarmik piiarneqarsimapput, DR-imut oqarpoq.

Immikkoortuni arlaqartuni angusinngitsoortut

DR malillugu NATO umiarsuarnut taamaaqatigiinnut, umiarsuit pineqartut taakku sisamat akuuffiannut, minnerpaamik 13-inik piumasaqaateqarpoq. Umiarsuilli piumasaqaatini arfinillit naammassisinnaagaat kontradmiraliusimasut marluk naliliipput.

Sinneri naammassineqanngillat ilaannakortumilluunniit naammassineqarlutik.

Sakkutooqarnermi pisortaasimasut assersuutigalugu tikkuarpaat, umiarsuit Thetisit qamutilii paassaallu qanittumiit silaannakkut saassussipallannernut illersornissamut naleqqutinngitsut, soorlu aamma umiarsuit immap qaani, immap iluani silaannakkulluunniit siooranartunut imaani sorsunnermut peqataanissamut eqqortunik sakkoqanngitsut.

NATO'P MINNERPAAMIK PIUMASAQAATAA

Umiarsuarnut suussuseqatigiinnut NATO’p minnerpaamik piumasaqaatai aalajangersimasut 13-it Thetisimik umiarsuarnit naammassineqarsinnaanerat pillugu kontreadmiraliusimasut marluk DR-imit nalileeqquneqarsimapput. DR’imi tusarfiit oqarneri naapertorlugit piumasaqaatit affai sinnerlugit umiarsuarnit angusinngitsoorfigineqarput.

Naliliinerit malillugit Thetisimik umiarsuit ilaatigut:

- imaani sakkutuut umiarsuaannut anginerusunut ilaasinnaanngillat tassanilu suliassanik tamanik isumaginnissinnaanatik.

- immap qaani, immap iluani silaannarmiillu siooranartunut imaani sorsunnermut peqataasinnaanngillat.

- unnuami silarluttumilu maluginiutit elektroniskiusut atorlugit paasissutissanik katersisinnaanngillat.

- torpedonik takkuttunik takunnissinnaanngillat sonarillu imaluunniit elektroniskiusumik allamut saasaatinik atorlutik imminnut illersorsinnaanngillat.

- radarinit atortorissaarutiniillu allanit paasissutissanik isumaginnissinnaanngillat.

Aallerfik: DR

Allisiguk

Isornarnartorsiuineq uteqqiasoq

Thetisimit umiarsuit aatsaat isiginiarneqalinngillat. Umiarsuit pisoqalisut sakkutooqarnermik immikkut ilisimasalinnit arlalinnit siornatigut sakkortuumik isornartorsiorneqartarsimapput.

Ilaatigut Torben Ørting Jørgensen, kontreadmiraliusimasumit illersornissamillu politikki pillugu peqatigiiffimmi Folk og Sikkerhedimi siulittaasuusimasumit.

- Thetisimik pitsaassusillit inissisimanerat ingerlatsinermi ataqatigiippallaarunnaarsimanerat ilisimaneqarpoq. Ilaartuinissamut atorneqarsinnaanerannillu sivitsorsaanissamut aningaasarpassuarnik atuineq aningaasanik atuilussinnanerussaaq, qaammatip aallartinnerani KNR-imut oqarpoq.

Tamannalu illersornissamik pituttorsimanngitsumik misissueqqissaartartumit Danmarkimilu illersornissamik ukiunit 40-nit sivisunerusumik misilittagalimmit Hans Peter Michaelsenimit isumaqatigineqarpoq.

- Thetisimik umiarsuit ukiunik 30-nik pisoqaassuseqalereerput, imaapporlu taarserneqannginneranni pisoqaasorujussuanngorsimassallutik. Tamanna umiarsuit aserfallatsaalinissaannut atatillugu ajornartorsiutaassaaq, kisianni aamma siunissami suliassanik ilumut isumaginnittuunissamut eqqortuunersut ajornartorsiutaassalluni, oqarpoq.