Sakkutuujusussaatitaasut siulliit nunatsinni sulilersut

Sakkutuujusussaatitaasut siullerpaamik nunatsinnukartinneqarput. Illersornissaqarfik nittartakkamini taama allappoq.

Sakkutuujusussaatitaasut Slesvigske Fodregimentimeersuupput sakkutuujusussaatitaasullu sulineranni sivitsorneqartumi februaarimi aallartittut ilaanniillutik.  

19-inik ukiullip Krabip Københavnimeersup peqataasinnaanini qujamasuutigaa.

- Maani Kalaallit Nunaanni sulisinnaalluni nuanneqaaq. Aasaanerani sivikitsumik feriareerluta aallarpugut. Nuanneraluartoq, uteqqinnissannut aallarnissannullu qilanaarsimavunga, Krab oqarpoq.

Sakkutuujusussaatitaasut Slesvigske Fodregimentimeersut siulliit qaammatini aqqanilinni sulisussat Nuummut aggustip aallartilaarnerani tikipput.

Sakkutuujusussaatitaasut Arctic Endurancemi sungiusarnerminni sakkutuutullu piginnaasaqarnerulernissamik sungiusaatigalutik siullerpaamik sulillutik kiffartuussissapput.

Sakkutuujusussaatitaasut aallaqqanerminni avinneqarput, ilaat Kangerlussuarmiipput ilaallu Nuummiillutik.

Sumiiffinni taakkunani marlunni pingaarutilinnik suliaqassapput, taakkulu kiffartuussinerannut ilaapput.

Suliassanik isumaginninneq sakkutuujusussaatitaanermi sivitsorneqartumi ilaavoq, taannalu illersornissamut isumaqatigiissummut atatillugu atuutilersinneqarpoq.

Illersornissaqarfimmi tamani sorsunnissamut piginnaasaqarnerulernissaq siunertaavoq, tassanilu sakkutuut allanik piumasaqaateqarfiusunik ilaatigut suliassaqarsinnaalersinnerisigut.

Sakkutuujusussaatitaasut sakkutuut suliassaannik assigiinngitsunik nunatsinniinnerminni isumaginniinnassanngillat. Sungiusarnerminni maannamut ilikkarsimasatik sungiusaannassavaat, nunamili sungiusimanngisaminni. 

Kangerlussuup, Qaasuitsup killingata avannaanniittup, eqqaani pinngortitap innat, narsaamanerit ataatsimilluunniit orpeqanngitsut ujaqqallu assigiinngitsunik angissusillit ilusillillu ilisarnaatigai.

Orpippassuaqarfinnit sakkutuujusussaatitaasut nalinginnasumik sungiusarfigisartagaannit allaanerujussuaq. 

- Nunarsuarmi maanna inissisimaffik pissutigalugu issittup nunaannik sungiussisimanerunissarput pisariaqarpoq, tamaaniinnitsinnilu sunigussiartorpugut. Sakkutuutut pisuinnartutut danskit pinngortitaanni orpippassuarni nunalluunniit qaavani matoqqasumi toqqorfissalimikkusunnerussaagut.

- Tamaanili nunap qaava ammaannartuuvoq, taamaattumik sakkutuut issittumi nunap qaavani qanoq toqqortoqarsinnaanera qanorlu takujuminarunnaarnissaq ilinniassavaat, Laura kaptajniusoq sakkutuujusussaatitaasunullu immikkoortortanut pisortaq oqarpoq. 

Sakkutuujusussaatitaasut nunap qaavani allaanerusumi sungiusarneq sungiusimavaat.

- Pinngortitamut tunngatillugu tamaani suna tamarmi allaaneruvoq nunallu qaavani ingerlaneq allaanerulluni. Tamaanimi sivingasorujussuarnik qaqqaqarpoq tamannalu nissunut malunnarpoq, Clemmens 20-nik ukiulik Aarhusimeersoq oqarpoq. 

Sakkutuujusussaatitaasut nunatsinni sungiusarnertik naammassigunikku Danmarkimi ilinniarnertik ingerlateqqissavaat tassanilu ilisimariikkatik misilittakkatillu tunngavigalugit ilinniaqqissallutik.  

RITZAU