Saharap sioranit qarsutsineq nunatsinni pivoq

Sahara sermersuarlu imminnut atassuteqanngikkaluarput, taamaattorli saharami sioqqat anorimit ingerlatsinneqartut ukiullu siuliini Islandimi innermik anitsinerit maanna kangerlussuarmi ajutoornermut annertuumik sunniuteqarput.
Allattoq Peter Troelsen, Salome Hansen
juulip 13-at 2012 12:08

Seqernup qinngornerata kissaanik sermersuup aakkiartupiloornera Kangerlussuarmi kuup qarsutsineranut pissutaalluinnarpoq. Maannalu Nunatta nunaqarfiisa annersaani innallagissamik imermillu pilersuisinnaanissaq navianartorsiortsinneqarpoq.

-Sermeq apullu qaqortumik qalipaateqarput, taamaattumillu seqernup qinngorneranit annertuumik aatsineqarsinnaanatik. Sioqqalli arsakullu sermip qaaniittut sermersuup qaava taarsisissimavaat. Taammaattumillu piffissami kingullermi sermersuaq aakkiartupiloorsimavoq, Sermersiooq GEUS-imeersoq Dirk Van As  taama oqaluttuarpoq.

Nunarsuarmi silaannaap kissatsikkiartornerani  isiginiarneqartariaqarpoq maanna piffissami qarsutsinerit immallu qaffakkiartornera. Tamatumanilu Nunatsinni eqqorneqarnerpaat ilagaatigut.

- Sermeq aakkuni ajoraluartumik sioqqat arsakullu tamarmik immamut ingerlanavianngillat. Annertoorujussuarlu sermimi uninngaannarluni qereqqittussaavoq, taamaalillunilu aappaagu aput aassimaleriarpat sermeq taartoq ajornatorsiutaaqqilissaaq. Taamaalillunilu Kangerlussuarmi maanna pisoq aappaagu uteqqissinnaavoq, Ilisimatuut, Danmarkimi nunatsinnilu geologit misissuisartut GEUS-imeersut  taama isumaqarput.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk