Russit ICC-p ataatsimeersuarneranut peqataatitaqarnerat Aqqaluk Lyngep eqqissiallaatigigaa
- Ruslandip Ukrainep ilaanik tiguaanerata kingunerisaanik USA-p Canadallu killilersuinerat pissutigalugu russit aallartitaasa Inuvimmukanngittoornissaat piffissami kingullermi ernumassutigigaluarpara.
AAMMA ATUARUK ICC-p ataatsimeersuarnera nittartakkatsinni malinnaaffigiuk
- Nunammi akiniutitut Issittumi Siunnersuisooqatigiit ataatsimiinnerinut peqataanngitsoortut takusareerpagut. Aallartitalli tamaasa, naggueqativut Tjukotkameersut ilanngullugit, tikimmata eqqissiallaatigaara, Aqqaluk Lynge KNR-imut oqarpoq.
Ernumaneq nuannaarnermik taarserneqarpoq
ICC-lli Tjukotkami siuittaasuata ICC-llu siulittaasuata tulliata Tatiana Achirginap oqaatigaa, naggueqatigiit Inuit Ruslandimiittut ICC-mi sulinerannut Ukrainemi ilungersunartorsiorneq sunniuteqarsimanngitsoq.
- Russit aallartitaata ICC-p ataatsimeersuarnissaanut peqataajartornissaat soorunami pilersaarutaajuarsimavoq, naak Canadami naalakkersuisut nunat allat Ukrainemi pisut isumaqatiginagit Ruslandimut piffissami kingullermi killilersuisimagaluartut.
AAMMA ATUARUK ICC-p ataatsimeersuarnera Inuvimmi ammaanersiorneqarpoq
- ICC-p Inuvimmi ataatsimeersuarnissaanut peqataanissatsinnut qilanaarpugut. Ukrainemili ilungersunartorsiorneq pissutigalugu ataatsimeersuarnermut peqataanngitsooratarsinnaanerput ernumagisimavarput, soorlu ICC-mit aamma tamanna ernummatigineqarsimasoq.
- Qujanartumilli taamatut pisoqanngilaq, Inuvimmukarnissarpullu assut qilanaarisimavarput, Tatiana Achirgina oqarpoq.