Russit aningaasarsiornermi iluanaarutaannik Ukrainemut ingerlatitseqqiinissaq isumaqatigiissutaasoq

Russit aningaasaataannit tigoqqusaanngitsunit iluanaarutit Ukrainemut ikiorsiinermut atorneqarsinnaanissaat EU-mi aallartitanit isumaqatigiissutigineqarpoq.

Belgia, EU-mi maanna siulittaasuusoq, inoqatinut attaveqaqatigiittarfikkut X-ikkut taama ilisimatitsivoq.

- Aningaasat Ukrainep siuariartornissaanut russillu akeqqersimaarneranni imminut illersorsinnaassusianut atorneqassapput, siulittaasoqarfik allappoq.

EU-mi nunat naalakkersuinikkut siuttuisa inatsit akuersissutigeqqaartussaavaat.

EU-mi atorfilittat sisamat oqarnerat naapertorlugu Ruslandip aningaasaataannit tigoqqusaanngitsunit iluanaarutit 90 procentiisa, aningaasaateqarfimmit EU-mit aqunneqartumit Ukrainep imminut illersornissaanissaanut atorneqartussamut ingerlateqqinneqassapput.

10 procentit kingulliit Ukrainep allatigut ikiorserneqarnissaaut atorneqassapput.

2000 milliardit koruunit 2022-mi tigoqqusaajunnaarsinneqartut

Aningaasat 2000 milliardit Rusland Ukrainemik 2022-mi saassusseqqammiinnartorlu nunat suliffissuaqarfiusut G7-it taamanikkut tigoqqusaajunnaarsippaat.

Aningaasat taakku qanoq pineqassanersut, EU nunallu suliffissuaqarfiusut G7-it kingorna oqallisigisimavaat.

Aningaasat Ukrainep ikiorserneqarnissaanut atorneqassasut EU-mi siuttut ukiup massuma aallartisimalaarnerani isumaqatigiissutigereerpaat.

Aningaasalli qanoq agguataarneqassanersut oqallisaajuarsimalluni.

Nunani tamalaani aningaasat erniaasa annertussusaat apeqqutaatillugu russit aningaasaataasa tigosusaanngitsut taakku akileraarusertinnagit 2027-mi 15 aamma 20 milliardit Euronik, tassa 112 aamma 149 milliardit akornanni iluanaarutaaffiunissaat ilimagineqarpoq.

Rusland eqqartuussivilersuussinissamik siusinnerusukkut sioorasaaruteqarnikuuvoq, EU-lu tillinniatut pasinikuullugu.