Rasmus Lyberth: Misigisaq tupinnartorujussuuvoq
Rasmus Lyberth, aperaarput qanoq misigisimanersoq.
- Misigisaq tupinnartorujussuuvoq, nalunagu nunarsuarmi tusaamasarsuit kisimi tassani tusarnaartitsisartut. Kalaallit qallunaanilluuniit siulliullutit qaaqqusaanerput tupinnaqaaq, Rasmus Lyberth oqarpoq.
Rasmus Lyberth, BBC-ip tusarnaartitsinera ammarpaa. Inuit tusarnaariat, qanoq qisuariarsimanerat ima eqqaavaa.
- Tusarnaariat tupigusunnguatsiaqaat, qajassuunnagit erinarsorfigigakkit. Erinarsoreerama tusarnaariat nilliarrattorsuupput, Rasmus Lyberth oqarpoq.
Rasmus Lyberth, ukiorpassuarni erinarsortartuuvoq, nuuteeqqanillu arlalinnik saqqummersitsinikuulluni. Royal Albert Hallimi erinarsornermi BBC-iimit filmiliarineqarpoq, tusarnaartitsinerlu naammassimmat tulluusimaarneq avaqqunneqarsinnaassumanngitsoq Rasmus Lyberthimit oqaatigineqarpoq.
- TV-liaq naammassimmat qullilinngitsuungilanga, eqqaasakkami amerlangaarmata, Rasmus Lyberth naggasiivoq.