Ramasjang Ilulissaniit nangeqattaartuliortoq
Danmarksradiop meeqqanut TV-kkut aallakaatittagaa Ramasjang Ilulissani meeqqat atuarfianni Mathias Storchimi immikkoortunik qulinik nangeqattaartuliorpoq.
Tassani 5.a.-mi atuartut ilaat ulluinnarni soqutigisaminnik sulerisarnerat malinnaavigineqarput.
Taamaaliorneq ilaatigut Danmarkimi meeqqat nunatsinni ulluinnarni inuunerup qanoq ittuusinnaaranik ilisimasaqarnerulersitsinissamik anguniagaqarnerusoq, Ramasjangimi aallakaatitassiornermi ilitsersuisoq, Ulla Søe KNR-imut oqarpoq.
- Nangeqattaartuliamik taamaattumik suliaqarnissaq pingaarpoq, aallakaatitassiat kalaallit meerartaasa tarrarsorfigisinnaallugillu imminnut ilisiarisinnaaniassammata. Aamma meeqqat allamiittut Kalaallit Nunaanni meeraaneq qanoq innersoq' paasisaqarfigineqarnerussagaat isumaqarpunga.
Atuartut aamma pissarsiaqaatigigaat
Nangeqattaartuliat immikkoortut qulit KNR-ip meeqqanut TV-kkut aallakaatittagaani Inuushowimi takutinneqareernikuupput.
DR-lli TV-kkut meeqqanut aallakaatitsiviata januaarip 27-anit aallartittumik maanna takutittalissavai.
Taamatut nangeqattaartuliorneq meeqqat atuarfianni, Atuarfik Mathias Storchimi, malinnaavigineqartunut qallunaajaqqanullu Danmarkimiittunut iluaqutitaqassasoq, pisortaq, Julius Jeremiassen oqarpoq.
- Ukiut kingulliit malunnarsiartornikuuvoq saqqummersinnaaneq ajornarsiartorpoq, ilaatigut immaqa inoqatinut attaveqatigiittarfiit atorpallaalernerisa taamanna kingunerisinnaavaa, kisianni eqqoriaanerinnaavoq. Kisianni inuit saani saqqummersinnaaneq ajornartorsiutaajartorpoq taamaalillunilu aamma ukununnga kingorna paasivarput iluaquterujuk saqqummersinnaanerat eqqarsaatigalugu.
- Imminnut ilisaritissinnaanerat inuit saanut sassarlutik oqalussinnaanerat allanullu iluaqutaasoq.
Dankit meerartaasa nunatsinni meeqqat ilikkagaqarfiginerussagai
Tassami Danmarkimi meeqqat inersimasullu nunatsinni ulluinnarni inooriaaseq pillugu ilisimasakinnerat ajornartorsiutaaqaaq.
Atuarfik Mathias Storchimi pisortaq, Julius Jeremiassen taama oqarpoq:
- Annerusumik ulluinnarni nalunngilara Danmarkimiit nunatsinni pisut ilisimaneqarpallaanngitsut uisitsisussatut nunatsinni pissusiviusut takunnilertussatut. Qanoruku nunatsinni atuartut ulluinnarni inuunerat qanoq ittoq, atuarnerat atuartitaanerat qanoq ippa? Ulluinnarni sammisai soqutigisai qanoq ingerlappat qanoq nalaataqartarpat atuartuutigut. Pissutsinik piviusunik uisitsisussatut isigivara.
Nangeqattaartuliaq ilaatigut meeqqat ulluinnarni soqutigisaanik soorlu, qimussinik sukkaniunneq, arsarneq, kaffillerneq ulluinnarnilu atuarfimmi sulerisarnersut malinnaaffigineqarput.
