RAL-ip Aalborgi 2022-mi taliffinnaariunnaassavaa
RAL nunatta Aalborgillu akornnanni maanna assartuisarpoq, sapaatillu akunneri marluk allortarlugit Islandimi Reykjavikikkoortarluni.
Eimskipimik suleqateqarneq qanoq kinguneqassava?
- Tamanna RAL-ip Islandip Europallu akornanni assartuisinnaanngorneranik kinguneqassaaq.
- Nunatta nunanik allanik niueqateqarnerulernissaanut iluaqutaassaaq.
- RAL umiarsualivimmut aalajangersimasumut taliffinnaaqarunnaarluni, umiarsualivinnulli arlalinnut taliffeqartalissammat allanik angallaveqalissaaq.
- Tamanna Islandimi umiarsuaatileqatigiiffiup Eimskipip Aarhusimi umiarsualivilerisoqareersup suleqatigineratigut pissaaq.
- Pilersaarutit malillugit Aarhusimut assartuineq akikinnerullunilu pisarinnerussaaq, tassanngaanniit nunanut tamalaanut assartuinermut angallaviit arlaliummata.
- RAL umiarsuartaani, umiarsuaataataani annerpaajusoq, Tukuma Arctica atorlugu assartueqataasassaaq.
- Eimskip umiarsuaatiminik Dettifossimik Brúarfossimillu assartuisassaaq.
Aalborg Havnilu maanna isumaqatigiissutaat naapertorlugu RAL-ip umiarsuaataasa 75 procentii Aalborg Havnimut pinngitsooratik talittassapput.
Royal Arctic Lineli isumaqatigiissummik taassuminnga 2022-p naanerani sivitsueqataaniarnani aalajangerpoq.
RAL-ip pisortaanera, Verner Hammeken, tusagassiortunut nittartakkakkut marlunngornermi sassarami taama oqarpoq.
RAL, nunatsinnut nunatsinniillu assartuinermik akisussaasuusoq, Islandimilu umiarsuaatileqatigiiffik Eimskip pingasunngornermi juunip ulluisa qulinganni assartuusseqatigiilissapput. Tusagassiortunik aggersaaneq tamatumunnga tunngavoq.
Nutaanik angallaveqalissasoq
Royal Arctic Line nunatta Aalborgillu akornanni angallavinnaaqarunnaarluni nunarsuup sinnerani nutaanik angallaveqalerusuppoq.
- Tassa maanna imaappoq, nunatsinnut nassiussiniaraanni, tamakku Danmarkimi umiarsualivimmi aalajangersimasumi containerinut allanut issorarneqartarput, RAL-ip pisortaanera Verner Hammeken oqarpoq.
AAMMA ATUARUK RAL-ip Eimskipimik ingerlaaqateqarnissaa kinguartinneqartoq
RAL-ip Aalborg Havn 2022-p naanerani suleqatigiunnaaruniuk tassani umiarsualiveqarunnaassaaq. Taamaammat umiarsualiviani sulisut taamaalinerani aamma suliunnaassapput.
Taamaammat nammineq umiarsualiveqaruunnaarluni Aarhusimi umiarsualivimmi kiffartuunneqarnermut isumaqatigiissuteqarpoq.
- Danskit piginneqatigiiffiata Mærskip assartugalerinermik suliffeqarfiutaalu, APM Terminals, isumaqatigiissuteqarput. Taamaammat umiarsualivilerisussaqalereerpugut. Aarhusimi umiarsualivilerisunik sulisoqassanngilagut.
2022: Aalborgi taliffinnaariunnaassavaa
Umiarsuaatileqatigiiffiup assersuutigalugu Aalborgi taamaalilluni taliffinnaariunnaassavaa. Akiliillunili umiarsuaatini umiarsualivinni kiffartuunneqartittalissallugit.
- Umiarsualivimmut ataatsimut taliffinnaaqarunnaarluta pisariaqartitavut aallaavigalugit tulaffeqartalissaagut. Assersuutigalugu ukiut tallimat qaangiuppata Fredericiamut Esbjergimulluunniit tulaffeqartalersinnaavugut, tassa aalajangersimasumut taliffinnaaqarunnaassaagut.
Tassa imaappoq, Aalborg Havn 2022-p naanerani taliffinnaariunnaarlugu nunatsinniit nunatsinnullu assartuisarneq eqaannerulissasoq, pisortaaneq oqarpoq.
Tamannali Royal Arctic Linep sullitaanut allannguuteqarallangaarnavianngilaq.
- Eimskipilu juunip ulluisa qulingannni assartuusseqatigiilerutta allanngortoqarnavianngilaq. Sullitagut Aalborgikkut nassiusisassapput, sullisseriaaserpullu nutaanik periarfissaqalernissatta tungaanut allanngornavianngilaq.
