Uummannami nukissiorfimmi suleqatigiinni aqutsisoq: - Qinneq kaanngarsimasoq banjoboltimik taaguutilik ikuallatsitsisoq

-Taama mikitsigisup nukissiorfik angisooq tamakkerlugu atorneqarsinnaajunnaarsissinnaavaa. Tupinnaqaaq, Gert Kjær oqarpoq.

Uummannami nukissiorfik juunip ulluisa 22-anni ikuallalerpoq. Danmarkimiit ikuallannermik immikkut ilisimasalik sapaatip akunnerata kingulliup ingerlanerani Uummannaliarpoq, Kalaallit Politiit suleqatigalugit ikuallannerup patsisaanik misissuiniarluni.

-Politiit Nukissiorfiup eqqaa pallinneqaqqunagu killilersorpaat, Danmarkimiillu ikuallannermik  immikkut ilisimasalimmik aggersaallutik. Siunissami taama pisoqaqqinnginnissaanut aamma iluaqutaassasoq, Gert Kjær oqarpoq.

Uummannami nukissiorfimmi suleqatigiinni aqutsisoq Gert Kjær. Assi © : KNR

Taassuma oqarnera naapertorlugu immikkut ilisimasallip ikuallannerup pilernerata patsisaa paasivaa.

-Motoorimi qinnerit ilaat kaanngarsimasoq paasivaa. Motoori atorneqartillugu qinnerit ilaat kaanngarmat uulia siaruaappoq. Uulialu ikuallalermat sukkasoorujussuarmik sakkortuumillu ikuallanneq siaruaappoq. Motoorip qulaani ikuallanneq qaminniarneqaraluartoq, sukkavallaartumik siaruaammat ikuallanneq qamisaruminaassimavoq.

Ikuallannerup patsisaa paasineqaraluartoq, ikuallattoornermik immikkut ilisimasallip nalunaarusiaa suli saqqummiunneqanngilaq. Qanittukkut saqqummiunneqarnissaa naatsorsuutigineqarpoq.

-Taama mikitsigisup nukissiorfik angisooq tamakkerlugu atorneqarsinnaajunnaarsissinnaavaa. Tupinnaqaaq, Uummannami nukissiorfimmi suleqatigiit aqutsisuat Gert Kjær oqarpoq. Assi © : KNR

Innuttaasut ernumasut

Illoqarfimmi innuttaasut arlallit KNR-imut pisoq ernummatigisimallugu oqaluttuarput.

Sofie Nielsen Uummannami ukiuni arlalinni najugaqarpoq. Nukissiorfik ikuallammat angalavoq.

-Angalalluta ernumavugut, kisianni qujanartumik atortussat sukkasuumik apuunneqarput, taanna oqarpoq.

Nukannguaq Lukassen Pilersuisumi pisiniarfimmi ikiortiulluni sulivoq. Sulilluni innaallagiaaruttoq eqqaamalluarpaa.

-Siullermik ikuallattoqartoq ilisimanngilara. Pisiniartunik sullissivunga, innaallagiaarummallu nalinginnaasumik qaminnganerinnaasoq isumaqaraluarpunga.

Ikuallanneq sakkortusiartortoq illoqarfimmi tupatsitsivoq.

-Tassanngaannaq Nukissiorfik ikuallalersoq takuara. Timikkut qisuariarpunga, sajulerpunga, tupaqqavunga qiarusulerlungalu, Nukannguaq Lukassen oqarpoq.

Assi © : KNR

Sarfaliuutit sisamat

Uummannap illoqarfia tamakkerluni maanna innaallagiaqaqqilerpoq, ajutoortoqartillugu sarfaliuutinik sisamanik illoqarfimmi assigiinngitsuni inissinneqartunik atuisoqarluni.

Taamaakkaluartoq Gert Kjærip oqarnera naapertorlugu tamanna ataavartumik innaallagiaqalernissaanut aaqqigasuaanerinnaavoq.

-Maanna ingerlatsineq aalajaappoq. Innaallagissiuutit assigiinngitsuniittut qaminniarlugit Nukissiorfittaarnissamut pilersaaruteqarpugut,  Gert Kjær oqarpoq, nangillunilu.

-Ataavartumik aaqqiissuteqartussaavugut, taamaalilluta nalinginnaasumik ingerlatsisinnaaniassagatta. Kommuni Naalakkersuisullu nukissiorfittaassap sumi inissinneqarnissaa pillugu oqaloqatigivagut.

Gert Kjærip Uummannami aalisakkeriviit pingasut innaallagissamik atuinerminnik annikillisaasimasut innuttaasullu innaallagissamik atuinerminnik nalinginnaq atueqqunagit kaammattorneqartut, ilanngullugu oqaatigaa.

Assi © : KNR

Innaallagiaqaqqileraluartoq suli qaminngasoqarsinnaanera aarlerinartuuvoq. Nukissiorfiit tamatumunnga piareersimasut, Gert Kjær oqarpoq.

-Najukkami allagarsiivinnut paasissutissanik nivinngaassuivugut, innaallagiaarutissappat inuit sumut sianissanerlutik ilisimaniassammassuk. Aaqqigasuaaneq nutaaliaanngikkaluartoq naammagittarallassaagut.

Sofie Nielsenip innaallagiaaruteqqinnginnissaa neriuutigaa.

-Innaallagiaaruteqqissasoralugu ernumavunga. Taamatut pisoqaqqissanngitsoq, sulisullu sulilluarnissaat neriuutigaara, taanna oqarpoq.

Uummannami nukissiorfittaassap sananeqarnissaa ukioq kingulleq aallartinneqarpoq. Aasakkut 2028-mi naammassineqassasoq pilersaarutaavoq.