Innuttaasut nipaat: Qinersisartut qinersiartornerminni isumaat assigiinngeqaat
Qineqqusaarneq sapaatit akunnerini tallimani ingerlasimasoq sakkortuseruttortoq nunami tamarmi qinersiviit ammarneqarput.
Nuummi Timersortarfiup silataani allagartarsuarmik takussutissaqarpoq inuit sukkut isissanersut. Tunuleriiaattulli ima amerlatigaat, matu alla nalunaaqutaq qulit missaani ammarneqartariaqarluni.
Qineqqusaarneq qinersisartut qanoq misigisimaneraat KNR-miit paasiniarparput.
Jakku Møller
Qineqqusaarnerit qanoq igaagit?
- Ukioq manna qineqqusaarnerit siuliini qineqqusaartarnerninngaanniit massakkumut killiffitsinnut pissanganarnerujussuupput.
Qineqqusaarutini qulequttat suut pingaarnerpaasorivigit?
- Pingaarnerpaajupput inuk qitiutillugu toqqissisimaneq, siunissamut ajunngitsunik eqqartuisut siuliinisut salloqittaanngitsut.
Naalagaaffinngussaagut imaluunniit naamik?
- Tassa siunissami angusassarput kialuunniit anguniagassaa siunissami naalagaaffinngornissarput.
Kalaallit Nunaat ukiuni tulliuttuni qanoq ingerlassasoraajuk?
- Ukiut tulliuttuni ingerlanissat ukiut siuliini immaqa pisartunik torersaanerillu, anguniagassallu, siunissami kingulissatta atugassaat neriuppunga kusanartumik aaqqisuussisoqarumaartoq politikkerinit, Naalakkersuisunit, Inatsisartunit, kingulissagut eqqarsaatigalugit.
Frank Rasmussen
Qineqqusaarnerit qanoq igaagit?
- Sakkortupput avissaartuullutillu.
Qanoq avissaartuukkamik?
- Partiit anginerniit isummat assigiinngippallaarput, anguneqarsinnaasunik suliaqarneq maqaasivara.
Qineqqusaarutini qulequttat suut pingaarnerpaasorivigit?
- Naalagaaffinngornissaq ukkatarineqarpallaarpoq, uannulli allanngorannginnissaq, anguneqarsinnaasunillu suliaqarsinnaaneq pingaarpoq ulluinnagut pitsaanerulissappata.
Naalagaaffinngussaagut imaluunniit naamik?
- Naalagaaffinngornissaq tamatta kissaatigigunarparput, sukkavallaamilli naalagaaffinngorniarsarissanngilagut.
Kalaallit Nunaat ukiuni tulliuttuni qanoq ingerlassasoraajuk?
- Oqaatigissallugu nalunarpoq. Neriuppunga malinnaasinnaassalluta naalagaaffinngorutta.
Vivian Schmidt Isaksen
Qineqqusaarnerit qanoq igaagit?
- Ataatsimut isigalugu qineqqusaarneq oqalliffiginera nunatta iluani pissuserpiaat amigaatigilaarpakka eqqartorneqarnerunissaat.
Qineqqusaarutini qulequttat suut pingaarnerpaasorivigit?
- Qineqqusaarutini pingaarnerpaatut isigivara ukiorpassuarni qineqqusaarutaasartut utoqqaat, meeqqallu taakkua allannguisoqassananilu annerusumik taakku amigaatigivakka avunga isigaluni qineqqusaarutinik aaqqiissutissanik taakkua amigaatigivakka, inituallaarnikuuvoq Amerika-mut tunngatillugu qineqqusaarneq, taakku uggorivakka, nunat iluani pissutsit aaqqitassat taama amerlareertigisut.
Naalagaaffinngussaagut imaluunniit naamik?
- Naalagaaffinngorumaarpugut kisianni piffissaq uani qinigaaffiup iluaniinnavianngilaq.
Kalaallit Nunaat ukiuni tulliuttuni qanoq ingerlassasoraajuk?
- Pissanganartorujussuuvoq malinnaaffigalugu, inuiaat allaanngilaq nikussaartut qinerserusullutik, aamma allannguerusullutik nipeqartut. Aamma politikkikkut siammasissumik neriuppunga suleqatigiilluarumaartut, aammalu qinersisartut ataqqineqassasut, suleqatigiilluarnissaannik tamarmik partiit akimorlugit pisariaqartupilussuuvoq.
Lars Mathæussen
Qineqqusaarnerit qanoq igaagit?
- Tassa qineqqusaallaqqissorujussuupput, nuanneqaaq. Pissanganartorujussuuvoq qanoq inerneqarumaarnerat.
Qineqqusaarutini qulequttat suut pingaarnerpaasorivigit?
Inuutissarsiornermut tunngasut pingaarnerpaatut isigiuaannarpakka.
Naalagaaffinngussaagut imaluunniit naamik?
- Naalagaaffinngussaagut pingaartumik.
Kalaallit Nunaat ukiuni tulliuttuni qanoq ingerlassasoraajuk?
- Namminiileriartoriaruni, aningaasatigullu tamakkiisumik aqutsileriaruni, suleqatigineqarsinnaasut nunarsuarmiut tamaasa suleqatigalugit, nunatsinni aningaasaq amigaatiginngilarput.
