Qinersinissanut marlunnut maanna allakkatigut qinersisinnaanngorputit

Inatsisartunut Kommuninullu allakkatigut qinersissaguit, qinersinerillu ulloq qinersivimmi ilaatissagukku maanna qinersisariaqarputit.

Allattoq Sikkersoq Rosing Karlsen, Helle Nørrelund Sørensen

februaarip 14-at 2025 13:24

Qinersinissat marluk qinersiffiungajalerput.

Nunatsinni addresseqaruit massakkullu nunatta avataaniillutit, massakkut qinersillutit krydsiliisinnaanngorputit.

Ulloq 11. Marts Inatsisartunut qinersisoqassaaq, Aprilillu aallaqqaataani kommuninut qinersisoqassalluni.

Danmarkimi kalaallit innuttaasut qinersinernut tamanut taasisinnaassasut Danskit Nunamut namminermut peqqissutsimullu ministereqarfiat kommuninut tamanut 98-iusunut allagaani allassimavoq.

Tamanna kommunimi soorlu innuttasunut sullissivimmi imaluunniit atuagaateqarfimmi pissaaq.

Allakkatigut kina qinersisinnaava?

Inatsisartunut allakkatigut qinersisinnaatitaavutit, piumasaqaataavorli:

Qinersiviup ulluani 18-ileereersimanissaq.
Nunatsinni najugaqarlutit peqqissutsimut tunngasunik pissuteqarlutit nunatta avataaniikkuit.
Minnerpaamik qaammatini arfinilinni sivisussusilimmik ilinniarninnut atatillugu nunatta avataaniikkuit.
Kalaallit Nunaat nunani allani kiffartuukkukku.
Namminersorlutik Oqartussanut sinniisuullutit nunani allaniikkuit.
Danmarkimi inissitassatut pineqaatissinneqarsimaguit.

Kommuninut allakkatigut qinersisinnaatitaavutit, piumasaqaataavorli:

Qinersiviup ulluani 18-ileereersimanissaq.
Qinersinissaq sioqqullugu kingusinnerpaamik sapaatit akunnerini arfinilinni kommunimi pineqartumi aalajangersimasumik najugaqarsimanissaq.
Kommuninut qinersinissamut pisinnaatitaavutit minnerpaamik qaammatini arfinilinni Kalaallit Nunaanni aalajangersimasumik najugaqareersimaguit, aamma qinersinissaq sioqqullugu kommunini sapaatit akunnerini arfinilinni najugaqareersimaguit.

Nunaqarfinni aqutsisunut aamma ilagiit sinniisaannut qinersisinnaatitaavutit, piumasaqaataavorli:

Kommuninut qinersinissamut piumasaqaatinik naammassinnissimaguit ilagiillu sinniisaannut ilaasortaaguit.

Paasissutissarsiffik: L 14 2020 aamma Valg til kommunalbestyrelse 2025.

Allisiguk

Allakkatigut qinersisussat kingusinnerpaamik qaqugu allakkatigut qinersissanersut allaqqanngilaq, allakkatigulli qinersisut danmarkimi kommunit allakkat nalinginnaasutut nassiutissavaat.

Qinersinerilli atuutsinneqassappat ulloq qinersivimmi qinersineq taamaatinnginnerani allakkat apuussimasariaqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.