Naalakkersuisoqarfik: Qimmivit saluppallaannginnissaat sianigiuk

- Ataatsimoorluta kalaallit qimmiisa nukittunerat, peqqinnerat tulluusimaarutaanerallu allanngutsaaliortigu.

Qimmit qimuttut qanoq paarineqartarnissaannut tunngatillugu tusagassiorfinnut nalunaarummi, Aalisarnermut, Piniarnermut, Nunalerinermut Imminullu Pilersornermut Naalakkersuisoqarfik taama allappoq. 

Ukiukkut issitsillugu qimmit nerukkarneqarnerusarnissaat naalakkersuisoqarfiup aallaqqaasiutigalugu nassuiaatigaa: 

- Qimmit qimuttannginnerisa nalaanni nerukkarnikinnerusinnaapput. Eqqaamalluguli qimmit sanigorpallaannginnissaat illit akisussaaffigigakku.

- Qimmit qimutsinneqassanngikkaangamik nerukkarneqarnikinnerusinnaapput. Eqqaamalluguli qimmivit saluppallaannginnissaat illit akisussaaffigigakku.

Saniatigut, qimmit nerisaannik inuussutissartaarutsitsisartunik qumaqannginnissaasa qulakkeerneqarnissaat isumagineqassasoq, tusagassiorfinnut nalunaarummi allaqqavoq. 

- Qumat qimunneq ajorput, - qimmitinuku qimuttut, taamaammallu inuussutissartaqartunik nerisussat, naalakkersuisoqarfik allappoq. 

Imissaq qumaajaatillu

Qimmivit ullut tamaasa alakkartarnissaat inatsisitigut pisussaaffiuvoq. Qimmit peqqissuunissaat, nerukkarluarneqartarnissaat, imissaqarnissaat kalunnerminnullu ilagussimannginnissaat qulakkeerneqassaaq. 

- Qimmivit aputeqannginnerani imissaqartuaannarnissaat isumagissavat. Qimmip qimuttup minnerpaamik 1 literi ullormut pisariaqartittarpaa, kissakkaangallu marloriaataanik pisariaqartitsisarluni, tamanna tusagassiuutinut nalunaarummi allaqqavoq. 

Saniatigut qimmit arnavissat ilumittut qimmiaqqallu sapaatit akunnerinik pingasunik, arfinilinnik qulinillu utoqqaassusillit qumaajarneqartassapput. Qimmit nerisaminnit qumaqalertarput anatillu aqqutigalugit tuniluussinnaallutik.

Kuummiuni qimmit 16-it nappaat tuniluuttoq apriilimi toqqutigaat. Taakku parvovirusimik toqquteqarsimanissaat, Uumasunut Nakorsaqarfik Inuussutissalerinermullu oqartussat pasitsaappaat. 

Tassunga atatillugu oqartussat virusi akiorniarlugu akiuussutissalersuipput. 

Nerukkaanermut, akiuussusiinissamut allanilluunniit qimminut tunngatillugu apeqqutissaqaruit, Kalaallit Nunaanni Uumasunut Nakorsaqarfik Inuussutissalerinermillu oqartussat attaveqarfigissavatit.