Qeqertarsuatsiaani kunngikkormiunik tikeraartoqannginnermi ulapputtut
Kunngikkormiunik tikeraartoqarnermut eqqaassutigisartagassamik Nunaqarfimmi aqutsisut qinnuteqarerput, neriuppullu marlunngorpat tikeriissasoq.
- Ilumut tikissanersoq pissanngatigaarput.
- Ujaraqqamut allagartaq ikkussassaq Nuummut aqagu (sisamanngorpat, aaqqissuisoqarfimmit) aatsaat tikissaaq, uagulli ullut qulikkaaginnarlugit angallammit tikinneqartaratta, ullormut persuarsiornartumut piareersimaqqullugu nammineq aasariaqassavarput, Qeqertarsuatsiaani kommunip allaffianeersoq Toni Broberg Lynge Radioavisimut oqarpoq.
Ujaqqami ima allassimasoqassaaq: "Kronprins Frederik nulialu Mary qitornatillu ulloq 5. august 2014 Qeqertarsuatsiaaniipput".
Kunngissakkut qulingiluanut tikissapput, nasiffimmut pisuttuarneq. Meeqqerivik Amauligaq, ungdomsklubbi mersortarfillu Amitsialak, nunaqarfik ulloqeqqata missaani qimannginnerani, pulaassavaat.