Qajarissanik Københavnimi qajartoqatigiittoqarpat kalaallit kulturiat namminerlu aalajangiisinnaassusiat ukkatarineqassapput

Qajartortut hunnorujulikkaat erfalasulisaarlutik Københavnip umiarsualiviani katersuutissapput. 

Peqatigiiffiit Mellemfolkeligt Samvirke aamma Uagut (Kalaallit pillugit Danmarkimi peqatigiiffik, aaqq.) aaqqissuisuupput. Taakkulu nunatsinnut ilungersunartumik sioorasaarisoqarnerani januaarimi akerliussutsimik takutitsinerni aamma aaqqissuisuupput. 

Nunatsinni piorsarsimassuserput maanna aamma ukkatariniarpaat nunatsinnullu tapersersuinertik qajartornikkut takutillugu.

Qajarissat 1.105-init amerlanerusut katersuutsinnissaat siunertarineqarpoq, taamaalillutillu Guinnessimi ataatsimut amerlanerpaat qajartortut rekortiliissutigineqarsinnaapput. USA -mi tamassuminnga 2022-mi rekortiliivoq. Aaqqissuussinerlu Naalagaaffiit Peqatigiit nunat inoqqaavinut ullorititaanik aamma malunnartitsissaaq.  

Siullertulli, kalaallinut tapersersuineruvoq kalaallillu piorsarsimassusaannik nalliuttorsiutiginninnerulluni, aaqqissuisut oqaluttuarput. 

- Pissaanilissuit Kalaallit Nunaannik suli tiguaaniarsarineranni Kalaallit Nunaannut tapersersuinerput takutikkusupparput. Kalaallit Danmarkimi najugaqartuusugut Kalaallit Nunaannik kalaaleqatitsinnillu tapersersuerusuppugut. Saniatigullu kalaallit piorsarsimassusaat pillugu ilisimasanik siaruartererusuppugut kalaaliunittalu tulluusimaarutiginera takutikkusullugu, Julie Rademacher Uagut-mi siulittaasuullunilu pisortaasoq oqarpoq. 

- Nunarsuarmioqaterpassuagut Kalaallit Nunaannut suli tapersersuerusupput Kalaallit Nunaallu eqqarsaatiminniitillugu takutikkusuppaat aamma tamat oqartussaaqataanerat sorsuutigerusullugu, taanna oqarpoq.  

- Inuit taavaniittut nikallujuinnissaat takutikkusupparput pisinnaasarpullu tamaat ikiuerusullutalu tapersersuerusuppugut. 

Kalaallit Nunaata piorsarsimassutsikkut kingornussaanik nalliuttorsiutiginninneq

Aaqqissuussineq aggustip qulingiluaanni nal. 13.30-miit 17:30-mut aaqqissuunneqassaaq. 

Nordatlantens Bryggemiit aallartissapput, tassanngaanniit umiarsualivitsigut Ofelia Pladsimut ingerlaassapput Sandkajimilu Nordhavnimi apuutissallutik. 

Isiginnaartitseqatigiit INUÀNIMA siuttuussapput. Taakku nipilersortartoq uaajeertartorlu Aviaja Lumholdt peqatigalugu umiarlummik ingerlaassapput. 

Isiginnaartitsisartoq erinarsortartorlu Nukaaka Coster-Waldau aamma takutitsissaaq aallartitallu arlallit oqalugiassallutik, Julie Rademacher oqarpoq.

Ingerlaarneq umiarsualiviup sinaani unippat, isiginnaartitsisussat kalaallit oqaluttuatoqaannik, nipilersugaannik uaajeertarnerannillu isumassarsiffigineqartumik takutitsissapput. 

Maannamut soqutigineqaqaaq, aaqqissuisut oqarput. 

Ukiumoortumik aaqqissuunneqartalerusuttoq

Qajartortartut 200 hunnorujunit amerlanerit qajartorniarlutik nalunaareerput, aaqqissuisullu - sila ajunngeriarpat takkuttoqarluarnissaa naatsorsuutigaat.

Nammineq qajariaqarluni peqataanissaq akeqanngilaq. Aaqqissuussinermili aamma atortoqarsinnaavoq, aaqqissuisulli - ajornanngippat - tapersersuinermut bilitsimik 149 koruunilimmik pisisoqarnissaa neriuutigaat.

Taama aningaasaliissuteqarneq kalaallit kulturiannik nalliuttorsiutiginninnermik aamma Kalaallit Nunaata Danmarkillu akornanni ataatsimoornermut nukittorsaataasumik qajarissamik ukiumoortumik takutitsisoqartalerneranik kinguneqarsinnaavoq.

- Ataasiaannartumik, ajornartorsiutaasumik qaangipallaannagassamik aaqqissuussisoqarneratut isiginninnginnissarput pisariaqarpoq - paarlattuanilli Danmarkip Kalaallit Nunaatalu aamma danskit kalaallillu akornanni atassuteqarnermut naligiiffiusumut, ataqatigiiffiusumullu nutaamut pissutissiinissaatut, Mellemfolkeligt Samvirkemi gerneralsekretæri, Tim Whyte oqarpoq.

- Aaqqissuussinerit ima ittut pingaaruteqartorujussuusinnaapput. Kalaallit kulturiannik nalliuttorsiutiginninnermut ataatsimoorfissamik ujartuinissarput pisariaqarpoq - aamma Danmarkimi. Tamanna nunat inoqqaavisa pisinnaatitaaffiinut tunngassuteqarpoq: tassalu nunat inoqqaavinik akuerinninnerusoqarnissaa.

Peqataanissamulli qajariaqarnissaq pisariaqanngilaq.

Soqutiginnittut takutitsinermut nunamit imaluunnit umiatsiamik immikkut ittumik angalaartitsinermut peqataallutik malinnaasinnaallutillu Kalaallit Nunaat aamma Kalaallit Nunaata Danmarkillu akornanni atassuteqarneq pillugit ilisimasaqarnerulersinnaapput.

Bilitsit peqataanissamullu nalunaarfissaq Billettomi nassaarineqarsinnaapput.