Politiit pisortaata isornartorsiuineq akuersaarpaa nipagiussiinnartarnermilli ileqqoqarneq akuersaarnagu

- Allaaserineqartoq atuarlugu ajuallappunga. 

Politiit pisortaat Bjørn Tegner Bay KNR-ip allaaserisaa pillugu qisuariarpoq, allaaserisami politiiusimasut marluk sulinerminni sakkortuunik misigisaqartarsimanertik, suleruluttarnertik tarnikkullu ajoquteqalersimanertik oqaluttuaraat. 

Oqaluttuaat tamaasa paasisinnaanngilai. Ajornartorsiuteqarnerali paasilluarpaa. 

- Oqaluttuaat paasisinnaavakka. Qularinngilaralu oqaloqatigisimasatit qanoq misigisaqartarnertik pillugu ilumoorlutik oqaluttuarsimassasut. 

Bayip Kalaallit Nunaanni Politiini nuannaanngitsunik suli sulisoqarnerarpaa.

- Ajornartorsiut piviusuuvoq. 

Isornartorsiorneqartulli aalajangersimasut arlallit akuersaanngilai.

Nipagiussiinnartarnermik ileqqoqarneq akuersaanngikkaa

Politiiusimasup ‘Piitap’ ajunngitsuusaarneq ikiortariaqaraluarlunili oqaaseqartannginnerit oqaatigai. 

Bayilli politiini ileqqorineqarunnaarsimasoq oqaatigaa. 

- Tamanna allaaserisami nipagiussiinnartarnermik ileqqoq, ammasumik oqaluuserinnittarnermik allanngortinnikuuarput, tassa tarnip pissusaanik ilisimasalimmik oqaloqatiginnittarnernik tarnikkullu pisunik oqaloqatiginnittarnernik. 

Bayip ukiuni kingullerni qulini pingaartumik ineriartorsimanerarpaa. 

Siornatigut angutit sanngiissutsimik takutitsinaveersaartarnerarpai, tassa politiitut naammagittarsinnaassuseqartariaqarnerit eqqaavai. Namminerlu nunatsinni ukiut 27-t matuma siorna inuusuttuulluni politiiunermini misigisimavaa. Maannali allanngoriangaatsiarsimanerarpaa. 

- Isumaqarpunga taamaattoqartarunnaartoq. 

Tarnikkut ilisimasalimmik oqaloqateqarneq pitsanngoriarsimasoq

Politiiusimasup aappaata ‘Miniup’ nunatsinni aalajangersimasunik tarnikkut ilisimasalinnik amigaateqarnerarpaa, nittartakkatigullu oqaloqatiginnittarnerit, akuttusuunillu tikittoqartarnera najukkami oqaloqatiginnittarfeqarfinninngaanniit pitsaanerunnginnerarlugu. 

Bayilli tamanna pitsanngoriarsimanerarpaa. 

Naalagaaffimmi politiinit tarnikkut ilisimasallit Kalaallit Nunaanni Politiinut piffissani aalajangersimasuni tikeraartarput oqaloqatiginnikkiartorlutik. Saniatigut oqarasuaatikkut nittartakkatigullu oqaloqatiginnittoqarsinnaavoq kiisalu naapinnikkut oqaloqatigiittoqarsinnaalluni. 

- Tarnikkut ilisimasalinninngaanniit paasisakka malillugit, tarnikkut ikiorserneqarneq Danmarkimi ataasiakkaarluni oqaloqatiginninnikkut neqeroorutigineqartup assinganik sunniuteqarpoq. 

Aamma sulisut najukkami tarnikkut ilisimasalinnik piumagunik oqaloqateqarsinnaapput. 

- Sulisoq tarnikkut ilisimasalimmik kalaallisut oqaloqatiginnikkusuppat kalaallisut oqalussinnaasumik ujarlertarpugut. 

Suliassanik ilungersuuteqarneq piviusuusoq

Bay politiiusimasut marluk pingaarutilimmut isornartorsiuinerannut isumaqataalluinnarpoq, tassa: Suliassanik ilungersuuteqarnerup qaffasinnera.   

- Suliassanik ilungersuuteqarnerulerneq aamma nammineerlunga malugaara. 

Kalaallit Nunaanni Politiinut nalunaarutiginninnerit affangajaat inunnik navianartorsiortitsinerupput soorlu: nakuusernerit, kinguaassiuutitigut kannguttaatsuliornerit toqutsinerillu. Danmarkimi politeeqarfinni tamanna 15 procentit missaanniippoq. 

- Sakkortuumik pisoqarnerit amerlasoorparpassuupput akulikillutillu. 

Taamaattumik politiit arlalitsigut tatineqarput. Ukiuni arlalinni isumaqatigiissummi nutaami, sulisut nutaat 50-it sinnerlugit aningaasassaqartinneqarput.  

- Aaqqiissutissaalluartutut isigaara. 

Politeeqarfiit ilaanni politiit marluusarput. Bayip sulisoqarnerulernerata sulinngiffeqarnerulersitsisinnaanera sulisullu sulinngiffimminni akisussaaffeqannginnerulernissaat neriuutigaa. 

Nunatsinni atugassarititaasut immikkuullarissut

Sulisoqarnerulernerli ajornartorsiutinik tamanik aaqqiissutaajunnanngilaq. Ilaatigut nunatsinni atugassarititaasut tunngaviunerupput. 

Kalaallit Nunaanni Politiit sulisarfii aqqusinermut atassuteqanngitsut 18-iupput. Inuiaqatigiinni ikinnerusuni politiit inuttut nalunngisatik pillugit suliaqarsinnaapput. 

- Kikkut tamarmik imminnut ilisimasut akornanni politeeqarpoq. 

Pingaartumik kalaallit politiit akornanni, Bay oqarpoq. 

- Atugassarititaappummi, politiit pisortaat oqarpoq. 

Politiit danskit politiit tamakku pissutsit pillugit ilaatigut piareersarniarsaraat. Piffissarli ungasinnerusoq eqqarsaatigalugu, kalaallinik politeeqarnerulernissaa pingaartumik ilaatigut aaqqiissutaasinnaanerarpaa. 

Thin Blue Linemut tunngatillugu isornartorsiuineq akuersaanngikkaa

‘Piitap’ politiini aqutsisut kattuffiup Thin Blue Linep naammaginanngitsumik tapersersuisimanerat isornartorsiorpaa. 

Bayip tamanna tupaallaatigaa.

- Tamanna ilisimanngilara. Piitamit oqaatigineqartoq eqqumiigilaarpara.

Kattuffik ataatsimeeqatigisarsimanerarpaa suliaalu pillugit suleqatiminut oqaluttuarisarlugit, aaqqissuussinerni peqataasarluni Thin Blue Linemullu oqalugiartarluni. 

- Isumaqarpunga Thin Blue Linep pitsaaqutai pillugit eqqartuisarlunga. 

‘Piitallu’ misigisaanik ataqqinnilluni aamma erseqqissaavoq. 

Thin Blue Linenillu politiit pisortaata taama oqarnera taperserpaa. Taakkua pisortaat Stinne Ølshøj KNR-iut tamatuma kingorna ima allappoq:

- Kalaallit Nunaata politiivini qullersat qanimut oqaloqatigaagut. Politiit pisortaata Kalaallit Nunaanniilernitsinnut atatillugu tapersersuingaarnera malugisinnaallugu nuannerpoq, anguniakkattalu assigiinnera erseqqippoq: Suliffitsik pissutigalugu napparsimalertartut tapersersorlugillu ikiornissaat. 

- Taamaaliornissatsinnut assigiinngitsunik periarfissaqarlutalu aallerfissaqarpugut, taamaattumik sulisitsisup Thin Blue Linellu suleqatigiinnerat pingaaruteqarpoq, pisortaq oqarpoq. 

Kalaallit politiit amerlanerulersut - ataatsimulli isigalugit ikinnerullutik

Politiiusimasut kalaallit politiit ikinnerunerarlugillu nunatta avataanit aqutsisut amerlanerunerarpaat. 

Tamanna Bayip ilumuunnginnerarpaa. 

- Tamanna killormoorpoq, taanna oqarpoq. 

Taassuma kalaallit tallimat politiini nakkutilliisumut maanna tullersortaanerarpai - tassa aqutsisut tullii - ukiut arfinillit matuma siorna ataasiinnaanikuugaluartoq.

Politiilli nalinginnaasut akornanni allatut inissisimasoqarpoq.

Politiit nalinginnaasut akornanni sulisut amerlassusaat, Bayip oqarnera naapertorlugu, allangoranngilaq. Ataatsimulli isigalugit ikinnerupput Kalaallit Nunaanni Politiini atorfiit danskinit amerlanertigut inuttalerneqarsimanerat pissutigalugu, taanna oqarpoq. 

Bayip oqarnera naapertorlugu, kalaallinik amerlanerusunik Politiinngorniarfimmut qinnuteqartitsiniarnerup iluatsinnginnera ajornartorsiutaavoq.

- Politiinik amerlanerusunik sulisussarsiornerput taamaaliornissatsinnullu aningaasassaqarnissaq iluatsipparput. Politiinngorniarfimmili amerlanerusunik aallartitsinissarput iluatsinngilarput.

Inuiaqatigiit qanoq inerannik ersersitsisut

Naak Bayip ineriartornerup isorinninnertulli ajortiginnginneraraluarlugu kalaallit politiit ikippallaartut ajornartorsiutaasinnaanera isumaqataaffigaa. 

- Politiitut iluatsissaguit inuiaqatigiit politiiuffigisavit qanoq innerannut ersersitsisuussaatit.

Innuttaasut 90 procentiisa missaanniittut nunatsinni inunngorput, Kalaallit Nunaannilu Politiini sulisut 75 procentiisa missaanniittut Bayip oqarnera naapertorlugu, nunatsinni inunngortuullutik. 

Politiit innuttaasunik pisuni ilungersunarnerpaaffinni naapitaqartartut akornanni agguataarineq 50-50-imut qaninneruvoq.

Tamanna allanngortinniarpaa.

- Kisitsit taanna siunissaq ungasinnerusoq eqqarsaatigalugu qaffasinnerulersittussaassavarput. 

Kalaallilli inuusuttut Politiinngorniarfimmut qinnuteqartartut ikippallaarput, qinnuteqarsinnaasullu suliffeqarfinnit allanit aamma piumaneqarlutik.

- Uannut ilungersunartoq tassaavoq tamanna iliuuseqarfigiuminaannera. Uanga ajornartorsiutiga aaqqikkukku allat ajornartorsiutaat annerulissaaq.

Misigisaat apeqqusinngikkai 

Naak isumaqataanngiffeqaraluarluni Bjørn Tegner Bayip politiiusimasut misigisaannik ilumuunnginneraannginnini erseqqissaatigaa. 

Taassuma taakkua misigisaat politiini taamani suligallarneranni pisimasutut ilumoorsinnaanerarpai - naak pissutsit taamani pissutsinut naleqqiullugit allanngornikutut isigigaluarlugit. 

- Ukua tusarfitit marluk salluneranngilluinnarpakka kukkunerarnagillu. Oqaluttuarisaat ilisarisinnaavakka.

Taamaattumik politiit naalagaannut ajornartorsiut ilumut piunersoq ilungersunanngilaq. Qanorli allannguisoqareertiginersoq apeqqutaatinneruaa - suliniutillu nutaat politiit amerlanerusut suliffitsik pissutigalugu napparsimalinnginnissaannut iluaqutaassanersut.

Taassumami oqarneratut:

- Inuimmi sulinertik pissutigalugu napparsimalernissaat naapertuutinngilaq.