Politiit Akisuanerit nalaani unnuaq "ulappussimasut": Nakuuserneq, eqqissiviilliorneq imigassartornikuullunilu biilertoq

Nuummiorpassuit tikeraallu Akisuanerit Festivalimi nuannisaqatigiinneranni politiit aqqusinerni angalaarput.

Kalaallit Nunaanni Politiini pigaartut pisortaat Heini Jacobsen, taamatut paasissutissiivoq.

- Unnuaq tamaat ulapittorujussuuvugut. Politiit unnuaq naallugu assigiinngitsorpassuarnut atatillugu angalaarput, pingaartumik Nuummi,  soorlu aqqusinermi eqqissiviilliortitsisunut, sumiiffinni assigiinngitsuni sinissimasunut aalakoortunullu.

Suliat ilungersunarnerusut ilaanni, politiit ullaaq nalunaaqutaq arfernup missaani nakuusernerit marluk – ataaseq Nuummi aappaalu Nuussuarmi, orniguffigisimavaat.

Nuussuarmi pinerluttutut pasineqartut ilaat tigusarineqarpoq, kingusinnerusukkullu unnerluutigineqassaaq. Pinerluuteqarsimasup aappaata kinaassusaanut tunngatillugu ilimatsaassaqarpugut, taannalu kingusinnerusukkut pissarsiariumaarparput.

Pisimasoq alla politiit suli misissuiffigaat.

Pissuserissaannginneq

Nakuusernerit eqqaassanngikkaanni, politiit pingasunik tigusarinnittariaqarsimapput - taakkualu aamma festivalimi peqataasunut attuumassuteqarput.

Tassani nakuusertoqarsimanngilaq. Pigaartullu pisortaata inuit pingasut taakkua iluamik pissuseqarsimannginnerarpai.

Taamaattoqartillugu tigusaasimasut tamat torersumiinnerat pillugu nalunaarut naapertorlugu pasillerneqarput.

- Tusarnaartitsinermut atatillugu inuit pingasut tigusarineqarput, taakkulu tamat torersumiinnerat pillugu nalunaarut naapertorlugu pasillerneqarput. kingorna iperagaaqqipput tamarmillu immikkut 1.500 koruuninik akiligassinneqarlutik.

Kiisalu politiit unnuakkut pingasut missaanni biilertoq imigassartorsimalluni biilersimammat unitsippaat.

Immissinnut paaralusi

Ileqqorissaarnissaq mianersornissarlu pigaartut naalagaata unnummut festivaleriaqqittussanut kaammattuutigaa.

Naak politiit ikiaroornartunik imigassamut akuliunneqarsimasunik nalunaarutiginnittoqarsimannginneraraluaraat, taamaaliortoqarsinnaammat suli mianersoqqusipput.

- Festivalernerup nalaani arlaanniluunniit ataasimoorfiusuni immiartorfigisaq arlaannut inississimagaanni, ikisisoqannginnissaa nakkutigisassaavoq.