Polenimi illoqarfiit ilaanni sapusiaq ajalusoorneqatsaalineqartoq
Polenip kimmut kujasissuani illoqarfimmi Nysami innuttaasut tuusintilikkuutaat illoqarfiup ungataani sapusiap ajalusuunnginnissaa pillugu marlunngornermut unnuaani ulappupput, tamaanimi ulluni kingullerni siallingaatsiarpoq kuullu qarsutsinissaa ernummatigineqarluni.
Sapusiaq taanna innuttaasunit 2000-t missaanniittunit, sakkutuunit aamma qatserisartunit puunik sioqqanik immikkanik ajalusoorneqatsaalineqarpoq.
Europap qiterpasissuani kangianilu inuit 17-init ikinnerunngitsut tamaani piffissami kingullermi siallingaatsiarnerani ajunaarsimapput, taakkunannga sisamat Polenimi.
Nysami innuttaasut 44.000-t portunermukarnissaannut marlunngornermut unnuaani kaammattorneqarput. Tuluit tv-qarfissuat BBC taama allaaserisaqarpoq.
Polenimi naalakkersuisut sumiiffiit qarsutsineqarfiusut nalaanni ajunaarnersuaqannginnissaa pillugu upalungaarsimasuutitaqalerput.
Østrigimi, Tjekkiami Rumaaniamilu qarsutsineqarnerani aamma ajunaartoqarsimavoq.
