Pinngortitaq Tasiilami meeqqanut ilinniartitsiffiussasoq
Tasiilami pinngortitaq atuartunut isikkiviinnaassanngilaq.
Misiliutitut suliniummi atuartut ilinniartinneqarnerannut qaqqat, kangerluit silamiinnerlu ilaalissapput.
Kommuneqarfik Sermersooq tusagassiuutinut nalunaarummi paasissutissiivoq.
Kommuni Folketingip Kalaallit Nunaannut Ataatsimiititaanit suliniummut 3 millionit koruuninik pissarsivoq, taakkulu ukiut marluk ingerlaneranni atorneqassapput.
Suliniut Tasiilami meeqqat pinngortitami ukioq naallugu susassaqartinneqarlutik ilinniartinneqartarnissaannut periarfissiissaaq.
Atuartut pinngortitami puigunngisaannagassaannik misigisassarsiortinneqartarnissaat taamaallaat anguniarneqanngilaq.
Imminnut upperinerulernissaat, eqqarsartaatsimikkut nukittunerulernissaat, akisussaassuseqarnerulernissaat pisinnaasamillu upperinerulernissaat aamma anguniarneqarpoq, taamaalillutik inuunermut sakkussaqarnerulissapput.
Sapiissuseqarnerulersitsissasoq
Suliniut The Polar Academy Greenlandimik ateqarpoq.
Kalaallit peqatigiiffiat aningaasanik iluanaarniuteqanngitsoq Sustainable Now, Skotlandimiillu peqatigiiffik The Polar Academy suleqatigalugit ingerlanneqassaaq.
The Polar Academy Greenland Skotlandimi suliniummit taama atilimmit isumassarsiarineqarpoq, taakkulu meeqqat inuusuttullu imminnut tatiginngitsut ikiortarpaat.
Tassani timersornerit, silamiinnerit misigisassarsiornerillu ingerlanneqartarput, meeqqallu ilungersunarsinnaasunik qaangiinissamut ilinniartinneqartarlutik.
Tamanna periuseq Tasiilami maanna misilittarneqartussanngorpoq.
Atuartut pinngortitami ilungersornermikkut isummaminnit pisinnaasaqarnerullutik paasinninnissaat anguniarneqarpoq.
Akisussaassuseqarneq, ajornartorsiutinik aaqqiinissaq ataatsimoortuniissinnaanissarlu aamma ilinniassavaat.
Suliniummi meeqqat inuusuttullu sapiissuseqarnerulernissaat nassuiaatigineqarpoq.
Pinngortitamiinneq
Suliniut aallartereerpoq. Atuarfimmiit ilinniartitsisut marluk suliniummi ilaapput ataatsimillu aamma sulilertoqassaaq, taassumalu ukiup ingerlanerani silamiinneq pinngortitamilu ilinniartitsineq ingerlattassavai.
Atuarfiup pisortaagallarnerata Anna Uzelac Nørgaardip oqarnera naapertorlugu, atuartut soqutiginneqaat.
- Atuaqatigiiaat naapeqqaarneranni kiinnat qungujulasut takullugit nuannerput, alapernaapput aperalutillu qajartorsinnaanerlutik, nalullutik aamma qissattaammik aalisarsinnaanerlutik aappaagu upernaakkut Skotlandiliarutta, tusagassiuutinut nalunaarummi oqarpoq.
Tasiilami pinngortitamiinnissaq aamma soqutigineqaqaaq, taanna oqarpoq.
- Ataatsimoorluarnermik aallartilluarneq. Assigiinngitsut akornitsinni suleqatigiilluarnissatsinnut qilanaarpugut, Anna Uzelac Nørgaard tusagassiuutinut nalunaarummi oqarpoq.
Angajoqqaat peqataassasut
Atuartut kisimik peqataassanngillat.
Angajoqqaat ataatsimeeqatiginerisigut aamma peqataatinneqassapput, tassani misigisimasaminnik avitseqatigiissinnaassapput tapersersoqatigiillutillu.
Tasiilap timaani pinngortitap ilinniartitsinikkut, atugarissaarnissamut sapiissuseqartitsilernissamullu qanoq atorneqarsinnaanera suliniummi aamma paasissutissiissutiginiarneqarpoq.
Suliniuteqartut piffissaq ungasinnerusoq eqqarsaatigalugu, misilittakkat atuartuinnarnuunngitsoq iluaqutaanissaat neriuutigaat.
Tasiilami meeqqanut, inuusuttunut ilaqutariinnullu amerlanernut sunniuteqarnissaa anguniarneqarpoq.
