Avataanit ikiorneqarnissaq taamaatinneqartoq: Pinngortitami ikuallattoqarnera ullualuit ingerlaneranni qamissangatinneqartoq

Sisimiut avannaani Kangerluarsuk Ungallermi nunarujussuaq sapaatiummat ikuallalerpoq.

Ikuallattoq ippassaq unnukkut aqunneqarsinnaalerpoq, qatserisartullu sumiiffimmi tamarmi qamiterisut, Qeqqata Kommuniani upalungaarsimasut pisortaat, Inunnguaq Lundblad oqarpoq.

- Aamaarneranik qamisaaleruttorpugut. Ulluni tulliuttuni arlalinni suli qamisaanissarput naatsorsuutigaarput, Inunnguaq Lundblad oqarpoq.

Ikuallattoq nakkutigineqarsinnaalermat avataanit ikiorteqarnissaq taamaatinneqarpoq. Nuummiit Danmarkimiillu pingasunngornermi ikiuiartortoqarnissaa pilersaarutaagaluarpoq.

- Ikuallattoq nakkutigineqarsinnaalermat taakku unitsikkallarpagut, Inunnguaq Lundblad oqarpoq.

Taassuma ikuallattoqalerneraniilli inunnit arfineq-marlunnik sumiiffimmiittoqaannavissimasoq oqaatigaa. Ikuallattoq pumpit kuummit qanittumit imaaniillu imermik milluaasut atorlugit qaminneqarpoq.

Mianersuaalliornermik pissuteqartoq

Qeqqata Kommuniata pisortaanerata, Hans Christian Svärdip ikuallanneq ‘mianersuaalliortoqarneranik’ pissuteqartoq KNR-imut oqaatigaa.

Tamanna Inunnguaq Lundbladip uppernarsarpaa: 

- Inuup mianersuaatsumik innermik atuineranik pissuteqarpoq.

Taassuma susoqarsimanera annerusumik oqaaseqarfigiumanngilaa.

Hans Christian Svärdip innuttaasut innermik atuinerminni mianersortarnissaannik kaammattuuteqarfigai:

- Innuttaasut cigarettinik, innernik assingusunilluunniit allanik igitsigaangamik, aamma pujoorinermi ikumatitsinermilu imermik piareersimasuuteqartuaannarnissaannik mianersortarnissaannik kaammattuuteqarfigeqqikkusuppakka.