Piniarneq pillugu Siunnersuisoqatigiit Ittoqqortoormiineersumit siulittaasortaarput
Piniarneq pillugu Siunnersuisoqatigiit nutaamik siulittaasortaarput.
Naalakkersuisut tusagassiuutinut nalunaarummi taama nalunaaruteqarput.
Inuussutissarsiutigalugu piniartoq Ittoqqortoormiineersoq, Åge Hammeken Danielsen, piniarneq pillugu Siunnersuisoqatigiinnut maanna siulittaasunngorpoq.
Siulittaasunngortup Tunumi piniartuunera pillugu KNR-ip siorna allaatigaa.
Ukiuni 20-ni kingullerni piniartuuneq qanoq ilungersunartiginersoq KNR.gl-imut oqaluttuaraa piniartunngornerminiillu illoqarfimini piniartut amerlassusaasa affaannanngorsimaneri aamma oqaluttuaralugu.
Siunnersuisoqatigiit nutaaq
Siulittaasunngortup saniatigut William Kriegel siulittaasup tulliatut toqqarneqarpoq.
Åge Hammeken Danielsenip kommunit sinniisuuffigai, William Kriegelillu TPAK, Tapertaralugu Piniartartut Aalisartartullu Kattuffiat sinniisuuffigissallugu.
Piniarneq pillugu Siunnersuisoqatigiinnut uku ilaasortaalerput: Ole Jørgen Davidsen Narsamiit, Steen Brandt Nuummi KNAPK sinnerlugu, Edvard Nielsenilu Qaarsuniit Avannaata Kommunia sinnerlugu.
