Timersorneq

Ilisimasalik futsalimi unammersuarneq sioqqullugu: Pikkunartumik unammersuartoqalerpoq

Illup iluani arsaannermi futsalimi pissartanngorniunneq ullumi ataasinngornermi aallartissaaq. Iligiit qulit puljenut naligiiffiusunut agguataarsimapput.

Allattoq Noah Mølgaard

apriilip 28-at 2025 15:02

Salloqittariaqartoqarluni, arsaarseriaasoqartarluni paarlatsissamaatiniit isiginnaartuniillu Nuummi timersortarfissuarmi Inussivimmi ualimiit suaartartoqarluni ilungersortoqassaaq.

Tassami dommerit siggarlutik nalunaarumaaprut angutit inersimasut futsalimi pissartanngorniunnerat NP aallartittoq unamminerillu sapaatiuppat finalertoqarnissaanut ingerlassallutik.

David Bror Janussen peqatigiiffinni arlalinni arnanilu nunanut allanut unammisartuni maannalu inuusuttuni kiisalu N-85-mi Narsami sungiusaasoq puljemut agguataarneq takuinnarlugu pissangaammillattaalereerpoq.

- Pulje A taarusuppara pikkunartorujussuusussatut, David Bror Janussen oqarpoq.

Anngunniunnerni angusaasut aallaavigalugit tassuma KNR-mi atugassamik nalilersuinera pivoq.

Pulje sakkortooq

Pulje A-miipput Nagtoralik Paamiuniit kujataani anngunniunnerit pingajuattut inissittut, Young Guns Nuummiit kujataani tullersortaasut. Taakku saniatigut siorna pissartat B-67 Nuummeersoq puljemeeqataapput. Aamma tassaniipput SAK Sisimiuniit avannaani anngunniunnermintullersortaasut kiisalu puljemi pissanganartorsuarmi iligiit tallimaat tassaallutik Nagdlúnguak Ilulissaniit avannaani anngunniunnermi ajugaasut.

Puljeniit iligiit marluinnaat ujaminnanniunnernut ingerlaqqissapput tamannalu sioqqullugu arfininngormat semfinalertoqassaaq.

- Assorsuaq pissanganarpoq kikkut pulje A-mi semifinalemut anngutissanersut. Unammineq siullermiit pissanganarseriissaapput, David Bror Janussen naliliivoq.

Ilimagisaalluartut

Puljep aappaaniipput kujataani anngunniunnermi ajugaasut IT-79 Nuummiit. Taakku puljeqatigaat I-69 Ilulissaniit, T-41 Aasianniit, N-85 Narsamiit kiisalu UB-83 Upernavimmiik taakkulu tamarmik anngunniunnermi angusarissaannginnernut ilaapput.

- Soorunami ilimagilluinnarpara IT-79 anngunniunnerminni ajugaasutut semifinalemut ingerlaqqissasut, David Bror Janussen oqarpoq.

- Kisianni eqqoriaruminaatsorujussuuvoq kikkut semifinalemut annguteqatigissaneraat. Assersuutigalugu UB-83 ukiut kingulliit pissartanngorniunnerni takunikuunngilagut. Kisianni qularnanngilaq pulje taanna aamma pissanganartorujussuussasoq, David Bror Janussen oqarpoq.

Futsal NP-mi aallakaatitsinissamut pilersaarut

Ataasinngorneq 28. april:
Nal. 14.00 Nagtoralik 45 – Young Guns pulje A
Nal. 16.00 IT-79 – T-41 pulje B
Nal. 18.00 B-67 – SAK pulje A
Nal. 20.00 I-69 - N-85 pulje B

Marlunngorneq 29. april:
Nal. 14.00 Nagtoralik 45 – Nagdlúnguak pulje A
Nal. 16.00 IT-79 – I-69 pulje B
Nal. 18.00 Young Guns – B-67 pulje A
Nal. 20.00 N-85 - UB-83 pulje B

Pingasunngorneq 30. april:
Nal. 14.00 SAK - Nagdlúnguak pule A
Nal. 16.00 UB-83 – T-41 pulje B
Nal. 18.00 B-67 – Nagtoralik 45 pulje A
Nal. 20.00 N-85 – IT-79 pulje B

Sisamanngorneq 1. maj:
Nal. 14.00 Young Guns – SAK pulje A
Nal. 16.00 I-69 – UB-83 pulje B
Nal. 18.00 Nagdlúnguak - B-67 pulje A
Nal. 20.00 T-41 – N-85 pulje B

Tallimanngorneq 2. maj:
Nal. 14.00 SAK – Nagtoralik 45 pulje A
Nal. 16.00 UB-83 – IT-79 pulje B
Nal. 18.00 Nagdlúnguak – Young Guns pulje A
Nal. 20.00 T-41 – I-69 pulje B

Arfininngorneq 3. maj:
Nal. 16.00 Semifinale 1
Nal. 18.00 Semifinale 2

Sapaat 4. maj:
Nal. 14.00 Bronzennaniunneq
Nal. 16.00 Finale + ujamminnatitsineq

Unammineq siulleq ullumi nalunaaqutaq marluut aallartissaaq. Puljenit tamaginnit iligiit marluk semifinalemut ingerlaqqissapput.

Unammerit aallarniutaasut ataasinngornermiit tallimanngornermut tamakkerlugit KNR-TV-mi aallakaatinneqassapput. Semifinalet ujaminnanniunnerillu aamma aallakaatinneqassapput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.