-Naammaleqaaq: Perorsaasut sulinermi atukkatik pillugit akerliussutsimik takutitsipput:

Perorsaasut sulisussaaleqisarnertik akerliussutsimik takutitsinerminni peqqutigaat. Akerliussutsimik takutitsinermi Kommuneqarfik Sermersuumi borgmesteri Avaaraq Olsen aamma Meeqqanut Inuusuttunullu Naalakkersuisoq Mariane Paviasen Jensen oqalugiartunut ilaapput.

Allattoq Jonna Enoksen Dahl

oktobarip 14-at 2026 10:52

Perorsaasut amigaataaneri ukiuni kingullerni takornartaanngilaq.

Nunatsinni Perorsaasut Kattuffiata maajimi 2023-mi nalunaarusiaa naapertorlugu, ulloq unnuarlu angerlarsimaffinni perorsaasutut sulisussani 817-inut amerlassusilerneqarsimasuni 470-it amigaataapput.

Sulisullu amigaataajuarmata perorsaasut Nuummi ataasinngornermi akerliussutsimik takutitsipput.

KNR-imiit takusinnaasagut naapertorlugit inuit 60-it missaanniittut akerliussutsimik takutitsinissamut takkupput.

Akerliussutsimik takutitsinnginnermi aaqqissuisoq Ulunnguaq Rosbach oqalugiarpoq.

- Maaniippugut meeqqeriviit, atuareernerit kingorna ornittakkat utoqqaat illuinik sulisut kiisalu inunnik sullissineq eqqarsaatigalugit sulisunik amigaateqartarneq annertuumik meerartatsinnut utoqqartatsinnullu sineriak tamakkerlugu eqqorneqartarnerat pillugit.

Taassuma pisortat sulisut atugaat piaarnerpaamik pitsanngorsassagat piumasaraa.

- Piumasarissavarput politikkikkut aaliangiisartut tamanna suliassaq pingaarnertut siullertut sammilissagaat. Missingersuutit pineqanngillat, inuit inuunerat pineqarpoq.

Perorsaasut naammatsittut

Akerliussutsimik takutitsisut ilagaat perorsaasoq Anna Lisa Ostermann, ukiut 35-t sinnerlugit perorsaasutut sulisuusoq.

- Qimungaaratta allaat meeqqanut inerisaanissatsinnut piffissaqanngilagut. Ullormut taamaallaat paarsineq, paarsineq, paarsineq. Sammissassaqartinniaraluarlugit taannaluunniit annerusumik pisinnaanngilaq.

Anna Lisa Ostermann Nuummi meeqqerivimmi sulisuuvoq, suliffimminilu sulisunik aamma amigaateqarput.

- Sulisut amigartangaaratta ilanngui soraartarput qullipillutik qiallutillu, tassali sulerulungaaramik. Taakkua pissutsit akuersaannginnakkit taamaattumik akerliussutsimik takutitseqataavunga.

Lisbeth Adolfsen aamma perorsaasuuvoq, aningaasarsiallu qaffanneqarnissaat kissaatigaa.

- Akerliussutsimik takutitsinermi peqataavunga pissutigalugu, perorsaasutut sulineq aamma socialpædagogit ikiortillu aningaasarsiaat annikippallaarujussuaramik.

Perorsaasullu iluarsiisoqarnissaa kissaatigaat.

- Neriunarpoq kiisami paasineqassalluta. Ukiorpassuarni 1980-kkunni 1990-kkunnili meeqqat qineqqusaarutaajuarput, meeqqat siunissaraagut. Annertunerusumik ulloq manna tikillugu pitsanngorsaatissanik NPK-imit, SIK-imit taavalu Inatsisartuniit annerusumik suleqatigiillutik qanoq iliuuseqarneq ajorput. Naammaleqaaq, Anna Lisa Ostermann oqarpoq.

- Kissaatigisorujussuuara Naalakkersuisut, Kommune peqatigiiffippullu iliuuseqarnissaat. Naammakkaluaqaaq taamannak pineqarnerput, Lisbeth Adolfsen oqarpoq.

Borgmester: Misissuivugut

Akerliussutsimik takutitsisut Nuummi Amisut eqqaani aallartipput, Kommuneqarfiup Sermersuullu eqqaanut pisoqatigiipput.

Borgmesteri Avaaraq Olsen Kommuneqarfik Sermersuup allaffissuata silataani oqalugiarpoq.

- Suliniutit assigiinngitsut suliarineqarput. Ilumoorpoq, ullormiik ullormut aaqqiissutissat taakku tikissinnaanngilagut ajornartorsiutit annertoqimmata, Avaaraq Olsen oqarpoq nangillunilu:

- Politikkikkut missingersuusiornernut isumaqatiginninniarnerit sapaatip akunneri marluk matuma siorna naammasseqqammisagut, tassani isumaqatigiissuteqarpugut. Meeqqerivinni sulisut, atuareernerup kingorna ornittakkani sulisut aamma utoqqaat illuanni sulisut pisariaqartitagut, immikkut ittumik ujartuiffigineqassasut. Ineqarniarnikkut, akissarsiatigut kisianni aamma suliffiup nalaani atugassarititaasut suut pitsanngorsaataasinnaaneranik misissuisoqassasoq.

Nunani allaninngaanniit suleqateqarnissaq ammaffigineqarnerusariartoq Avaaraq Olsenip aamma oqaatigaa.

Inatsisartut Naalakkersuisorlu oqalugiartut

Kommuneqarfik Sermersuup aallaffissuata eqqaaniit Inatsisartoqarfimmut ingerlaqqipput.

- Naammaleqaaq, akerliussutsimik takutitsisut ingerlaarnerminni taama suaartarput.

Inatsisartoqarfiup silataani inatsisartunut ilaasortat Aki-Mathilda Høegh-Dam (N), Erik Jensen (S), Pipaluk Olsen (D), Aqqalu C. Jeremiassen (A), Margrethe Thårup Andersen (D), Mette Arqe-Hammeken (N), Gerth Mikaelsen (N) aamma Justus Hansen (D) tusarnaarput.

Meeqqanut inuusuttunullu Naalakkersuisoq Mariane Paviasen Jensen aamma peqataavoq.

Naalakkersuisup oqalugiarnermini suliniuteqarnissani neriorsuutigaa:

- Neriorsuutigivara kattuffiit kommunilu suleqatigalugit meeqqerivinnut tunngatillugu sulisussanullu tunngatillugu amerlisaaniarnermut suliniuteqarnissara kissaatigalugu saaffiginnikkumaarlunga, Mariane Paviasen Jensen oqarpoq.

Siumut sinnerlugu Inatsisartunut ilaasortap Erik Jensenip akerliussutsimik takutitsisut tapersersorlugit oqariartuutigaa.

- Takusinnaavara allagartarsuarni qineqqusaarutisi piviusunngortilaarsigit, taanna isumaqatigeqqissaarparput Siumuminngaanniit.

Naleraq sinnerlugu Inatsisartunut ilaasortaq Aki-Mathilda Høegh-Dam oqalugiartut ilagaat.

- Maluginikuuisiuk? Allannguerusullutik qineqqusaartut uummateqavillutik meeqqanut meeqqeriveqarfinnut allanullu qinerneqaraangamik allanngortoqarneq ajortoq?

Demokraatit sinnerlugit Inatsisartunut ilaasortaq Pipaluk Olsen peqqissaasut tapersersorlugit aamma oqariartuutigaa.

- Neriuppunga nipituuliuutigiuaannassagissi, kisianni aamma Inatsisartuninngaanniit nipituuliuuteqartuaannassaanga.

Taakkualu tamarmik perorsaasut sulinerminni atugassarititaat Inatsisartuni eqqartorneqarnerulernissaat sulissutigerusuppaat.

Akerliussutsimik takutitsinermi aaqqissuisup Ulunnguaq Rosbachip borgmesterip Avaaraq Olsenip oqariartuutai naammaginngilai.

- Uanga mamaagilaarpara pissutigalugu allamiuninngaanniit tikisitsiniarnerat taanna anguniarneqarmat ersarittumik. Kalaallit uagut uffa kulturerput, uagut nunarput, uagut nammineq pigisarput.

Illuanili Naalakkersuisup oqaaseqaatai isumalluarfigai.

- Mariane Paviasen Jensenip oqaatigisaatuut taakkua meeqqerivinnut tunngatillugu aamma siunnersuuteqarpoq nammineerlunilu akissutigivaa neriorsuutigalugulu suliarineqartariaqartoq aamma tusaatitassatut tigugaat.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.