Peqqissaasut perorsaasullu naartuminnik katatsinissaminnut qaninnerusut

Suliffimmi avatangiisini misigissutsikkut isummakkullu atukkat arnat naartunerannut sunniuteqarsinnaapput naartumillu katatsinissamut navianartorsiornerulersitsisinnaallutik.

Bispebjergip napparsimaviani sulinermik avatangiisinullu immikkoortortaqarfiup misissuinerata nutaap takutippaa, arnat naartusut, sulinerminni timikkut nakuuserfigineqarnissaminnut aarlerinartumiittut misigissutsikkullu qaffasissumik piumaffigineqartut, naartusunit allanit taamatut atugaqarfiusumi suliffeqanngitsunit naartuminnik katatsinissaminnut 1,2-riaammik ilimanaateqarnerusut.

Danmarkimi Suliffimmi Avatangiisinik Ilisimatusarfik (NVA), misissuinermi peqataasoq, tusagassiuutinut taama nalunaaruteqarpoq.

Naak imminnut atassuteqarpallaanngikkaluartut, misissuinerup inernerisa maluginiarnissaannut pissutissaqarluartoq, Karin Sørig Hougaard, NFA-mi ilisimatooq oqarpoq.

- Sulisunut ataasiakkaanut naartumik katatsinissamut aarlerinartoqangaanngilaq. Tamatuma erseqqissarnissaa pingaaruteqarpoq.

- Arnarpassuilli misigissutsikkut ilungersunartunik imaluunniit timikkut nakuuserfigineqarnissamut aarlerinartoqarfiusumi suliaqarput, taamaattumillu naartusut isummamikkut inuttut atugarisaat eqqarsaatigalugit sulinerup avatangiisiinik innuttaaqatigiinnit eqqumaffiginninnissaq pingaaruteqarpoq, taanna nalunaarummi oqarpoq.

Suliffimmi avatangiisini misigissutsikkut isummakkullu atukkat aarlerinartorsiortitsisinnaasut

Suliffiit sulinermi timikkut nakuuserfigineqarnissamut aarlerinartorsiorfiusut misigissutsikkulluunniit piumasaqaatinik annertuunik atugaqarfiusut, napparsimasunik, ilinniartunik sullitalluunniit attaveqarfigisarnerinik ilaatigut imaqarput.

Peqqissaasuusinnaapput, ilinniartitsisut, perorsaasut imaluunniit isumaginninnermi siunnersortit.

Suliffimmi avatangiisini misigissutsikkut isummakkullu atukkat naartusunut aarlerinartoqartitsisinnaanerat, siornatigut misissuinernit paasinarsereerpoq. Uippakajaarneq naartumik katatsinermut erniaarnermulluunniit ilaatigut attuumassuteqartinneqarpoq.

Naartusulli misigissutsikkullu annertuumik piumasaqarfiusumi nakuuserfigineqarnissamullu aarlerinaatilimmi sulisarnerup imminnut atassuteqarnerat, misissuinermi nutaajusumi siullerpaamik misissorneqarpoq.

- Suliffimmi timikkut atukkat naartunermut qanoq sunniuteqarsinnaanerat pillugu ilisimasat amerlapput. Misissuinerput naapertorlugu naartusut suliffimminni misigissutsikkut isumakkullu atugarisaasa misissorneqarnissaat aamma pingaaruteqarpoq, Bispebjergip napparsimmaviani ilisimatooq Camilla Sandal Sejbæk oqarpoq.

Arnanit 1 millioninit 1977-ip 2018-illu akornanni naartusimasunit nalunaarsukkat, misissuinermi sukumiisumik misissorneqarput.

/ritzau/