Aningaasaliissutit neriuuteqalersitsipput: Nakorsiartartummi utaqqerujussuartarnitik qatsulluinnarpaat
Dronning Ingridip Napparsimavissuani Nuummiittumi nakorsiartitsinerit pitsanngorsarneqassapput.
Taamaammallu napparsimavissuarmi nutaamik MR-scannerummik 3,5 millioninik nalilimmik pisisoqassaaq sulisunillu ilinniarsimasunik amerlanerusunik sulisoqalissalluni.
Aningaasaqarnermut akileraartarnermullu ataatsimiititaliap akuersineratigut katillugit 10 millioninik pinasuartumik aningaasaliisoqarpoq.
Peqqissutsimut naalakkersuisoq Mimi Karlsen (IA) tusagassiutinut allalluni erseqqissaavoq aningaasaliissutinit 3,5 millioner koruunit ilaatigut soorlu nakorsiartitsisarfimmi saaffiginnittarfiup iluani sulisut amerlisinneqarnerinut atorneqassasut, taamaaliornikkummi sulisut saaffiginnittut amerliartuinnartut pillugit assoroqisut oqilisaanneqartussanngussapput.
Nuummiorpassuit nakorsiartartut ilisimariigaattut oqarasuaatikkut nakorsiarnermi utaqqisorpassuusarput, taakkunanilu nakorsiarnerni sulisut aamma amigartarnerat ajornartorsiutaavoq.
KNR-miit Nuummi innuttaasut nakorsiarniartarnerat pillugu apersorpagut taakkulu ilaatigut aamma aperaagut Peqqinnissaqarfiup maanna aningaasanik amerlanerusunik pissarsisussanngornera qanoq igineraat.
Amalie Poulsen
Nuummi innuttaasorpassuit nakorsiarniartillutik assut ilungersortarput illit qanoq tamanna misilittagaqarfigaajuk?
- Aasaq arlaleriarlunga nakorsiarniarlunga sianeqattaaraluarpunga iluatitsinngilangali. Ullut ingerlapput kiisa ukiarpoq sulilu iluatitsinanga, ila suli nappaateqanermikkut ajornerusumik atugalinnut ajortarsimassaqaaq, soorunami doktor.gl-kkut allattoqarsinnaavoq kisianni utoqqaligaanni tamakkualu teknikkitallit atugarinngikkaanni nalunartarput.
Qanoq ilinikkummi aatsaat iluatitsivit?
- Aatsaat juullilersoq iluatitsivunga. taamaalineranilu nakorsaataaruppunga sianeqqittariaqaramalu sianerpunga. tamanna ajorluinnarpoq oqarasuaatikkut nakorsiartitsineq ilungersunartorujussuuvoq.
Qanoq tamakku pitsanngortinneqarsinnaappat?
- Isumaqarpunga inuit anniaatillit salliutinneqartariaqartut. pingaartumik utoqqalilluni malunnartaqaaq, 70-nik ukioqarpunga uanniillu utoqqaanerit pitsaanerusumik sullinneqartariaqarsoraakka.
Maanna Peqqinnissaqarfik aningaasaliiffigineqalerpoq tamanna qanoq isumaqarfigaajuk?
- Nutaarsiassaq tusarakku eqqissiallappunga, pingaartumik inuit uanniit napparsimanerit eqqarsaatigalugit.
Ane Grethe Lundblad
Nuummi innuttaasorpassuit nakorsiarniartarnertik assut kipiluttunarisarpaat, illit qanoq tamanna misilittagaqarfigaajuk?
- Utaqqinartartorujussuuvoq, ilaanni akunnerup affaata qeqqata tungaanut utaqqisarpugut. Uanga inulerisuuvunga, inuillu akornanniiutigalunga nakorsiarniarsarigaangama assut uippakajaalertarpunga tamannalu ullup sinneranut sunniuttarpoq.
Maanna peqqinnissaqarfik amerlanerusunik aningaasaliiffigitittussanngorpoq tamanna tusarlugu qanoq igaajuk?
- Neriuppunga pissutsit oqinnerulissasut. Siornatigut napparsimaviliarluta nakorsiartarpugut ingerlaannarlu isertarluta. Ullumikkut utaqqerujussuartarpugut, malugisarparalu inuppassuit tamanna assut iluarineq ajoraat.
Paninnguaq Brandt
Nuummi innuttaasorpassuit nakorsiarniartarnertik assut kipiluttunarisarpaat, illit qanoq tamanna misilittagaqarfigaajuk?
- Ippassaq paniga nakorsiunniarlugu sianeraluarpunga angumerineqanngitsoorpungali, ullaaq sianeqqippunga sulilu aamma uterfigineqanngilanga. Meeqqagut isumaalugalugit nakorsiuttarpagut, isumaqarpunga angajoqqaajulluni periuseq tamanna toqqissisimananngitsoq angajoqqaatummi kissaatigisarparaluarparput qitornatta nakorsamit ingerlaannaq takuneqarnissaa.
Pissutsit tamakkua qanoq pitsaanerulersinneqarsinnaappat?
- Tamanna eqqarsaatigisarpara, qangamut uteqqikkaanni qanoq issagaluarnersoq, ammukaannarluta pisarnikuuvugut taamanilu sukkanerusumik nakorsamut isertarpugut.
Maanna peqqinnissaqarfik amerlanerusunik aningaasaliiffigitittussanngorpoq tamanna tusarlugu qanoq igaajuk?
- Pissanganarpoq neriunarlunilu neriuppungalu ajornartorsiut aaqqinneqassasoq.
