Peqatigiiffik MAPI matulersoq
Peqatigiiffik MAPI nammineq piumassutsiminik suliaqartunit ingerlanneqartoq aamma ilaatigut ilaqutariinnik meerartalinnik atugarliortunik tapersiinermik peqatigiiffiusoq matusariaqalerpoq.
- Peqatigiiffiup matunissaanik nalunaaruteqarnera annernangaarpoq, siulersuisunut siulittasoq, Laila Berthelsen mailikkut allappoq.
Politikkikkut suliat aporfiusut
Taassuma oqarnera naapertorlugu peqatigiiffimmut tapiissuteqartoqannginnera soqutiginninnerullu amigaataanera pissutigalugu matulerpoq. Tamatumalu saniatigut nammineq kajumissutsiminnik suliaqarusuttussarsiniarneq ajornakusoorlunilu suliffeqarfinnit taperserneqarnissaq ajorkusoorpoq, pissutigalugu peqatigiiffiup suliarisai amerlasuutigut ‘suliaasarput oqimaatsut pisunilu amerlasuuni politikkimut tunngassuteqarsinnaallutik’.
MAPI-mili suliaqarneq ilikkagaqarfiusimaqisoq, Laila Berthelsen suliat ataasiakkaat amerlasuut peqatigiiffiup suliarisimasai pillugit allappoq.
Peqatigiiffik sammisamik pimoorussinerup amigaataanera ilungersunartullu pissutigalugit 2024-p naanerani matussaaq.