Partii Inuit kalaallisuinnaq saqqummiussisassapput

Ilaatigut tamakku anguniagaallutik partii nutaaq, Partii Inuit ippassaq pilersinneqarpoq. Partii Inuit nunatsinni partiinit tamanit saamerliunerpaatut inissisimasussap anguniagaasa ilaat qularnanngitsoq tassaavoq, inuiaqatigiit kalaallit pillugit sassarnerat.

- Inuiaqatigiinnut kalaallinut sassaluta 100 procentimik nalornissutitaqanngitsumik oqaatigisinnaavara.

Partii Inuit pilersitsisuisa ilaat, Nikku Olsen partiimilu siulittaasussatut innersuunneqartoq taama oqarpoq imalu nangilluni oqarluni.

- Unagut aalajangiusimaniarparput, Nunarput inuiaallu kalaallit pillugit aalajangersaaniarnerni oqallinnernilu kalaallisut oqaatsigut toqqammavigalugit ingerlatserusukkatta. Taamaattumik tusagassiutini aamma qineqqusaarnerni kalaallisut oqaatsigut kisiisa aallaavigalugit suleqataaniarpugut. Taamaaliorniarpugut nunasiaataasimanerup nassataanik pissusitoqqanut maniguutiinnarusunnginnatta, Nikku Olsen oqarpoq.

Aatsitassat pillugit aatsitassallu qaqotigoortut uranimik akoqartut nunatsinnit annissuunneqalinnginnerini, inuiaqatigiit Nunaminnik piginnittuusut aperineqaqqaartariaqartut, partiip nutaap anginiagaasa ilagaat.

- Iisummagut taakkuussapput aamma innuttaasunut anngunniagassagut. Taakkulu aalajangiusimasariaqarpavut, innuttaasut aperineqartariaqarmata aamma nunap pisuussutai inumminnit pigineqarmata Naalakkersuisunit pigineqaratik.

Nikku Olsenip aamma oqaatigaa Inatsisartunut kingullermik 2009-mi qinersisoqarmat,  inuiaqatigiit ataatsimoorussaat tassaammat inuiattut namminersornissarput Namminersornerullu iluani anguniagassat soorlu aatsitassarsiornermut tunngasut. tamakkuli anguneqarsimanngitsut Nikku Olsenip oqaatigaa.

- Pissutsit equngasut ima ersaritsigaat, aningaasat milliardilikkaat eqqartorneqagaarmata, inuit inissaaleqisut, suliffissaaleqisut angerlarsimaffeqanngitsullu takussaagaluttuinnarlutik, tamanna minnerpaamilluunniit miserratigineqarsinnaanani.

Taamaattumik Nikku Olsen isumaqarput, immitsinnut akigissanngikkutta inuiaqatigiittut immitsinnut aperisariaqartugut Nunatsinni susoqarnersoq.

- Taamaattumik inuiattut immitsinnut qiviartariaqarpugut aperalutalu susoqartoruna? Aningaasat milliardilikkaat eqqarsaatigigaaratsigit inuiaassuserput akiginiarparput? Tamanna piviusorsiortuusinnaanngitsoq uanga isumaqarpunga, Nikku Olsen oqarpoq.

Nunatsinni partiit politikkikkut oqariartuutaat naapertorlugit, sumi taakku inissisimaneri Nikku Olsenip ima nalilerpai.

- Talerperlerpaat tassaapput Demokraatit taakkununnga qaninnerpaallutik Inuit Ataqatigiit. Saamerlernut aallariartunut ilaallutik Atassut, Siumut aamma Kattusseqatigiit Partiiat. Tassa Nunatsinni politikkip ullumikkut inissisimaneri isumaga naapertorlugu taamaapput.

Partii Inuit pilersitsisuisa ilaat, Nikku Olsen taama oqarpoq.

Partii Inuit siulersuisuisa katitigaaneri imaapput:

Siulittaasoq Nikku Olsen, siulittaasup tullia Mette Lynge, siulittaasup tulliata aappaa Randi Broberg, siulersuisuni ilaasortaallutik Jens Peter Lange, Frederik Lange, Peter Christensen, Poul Egede Jensen sinniisussaallunilu Georg Olsen.

Taakku katitigaaneri pisortatigoortumik saqqummiunneqassapput sapaatip akunnerata tulliani.