Issittumi pissaaneqarniuttoqarneruleraluttuinnarnera Kalaallit Nunaannilu qinersisoqangajalernera paasissutissanik eqqunngitsunik siammarterisoqartarneranik malitseqarpoq, taamaanneralu nunat allat naalagaaffiisa iluaqutissarsiorfigisinnaavaat.

Danmarkimi politiit isertortuimik paasiniaasartui (PET) tusagassiorfinnut taamma nalunaarput.

Taamaammat nunat allat naalagaaffii Inatsisartunut qinersinissamut sunniuteqaratarsinnaanerat oqartussat alaatsinaaffigaat.

Nunat allat naalagaaffii qinersinissamut soqutiginninnerat pissusissamisoortuusinnaallunilu nunanut allanut atorfilittatigut nalinginnaasumik, aningaasarsiornikkut kulturimilluunniit suliaqarnermi attaveqarnerusinnaalluni, PET tusagassiorfinnut nalunaarummi aamma allappoq.

Aammali akerlianik inatsisaatsuliorluni sunniiniartoqartarpoq.

Ingammik inoqatinut attaveqaatitigut eqqunngitsunilk paasissutissiisoqartarpoq.

Ilaatigut Danmarkimi Kalaallit Nunaanniluunniit politikeriusuusaarluni inoqatinut attaveqaatitigut taamaaliortoqartarpoq, oqallinnermi avissaartuuttoqalersitsisunik.

Inatsisissatut siunnersuut nukinnguussaasoq

Aamma isummat allaasut atuuttuulerseqqullugit kalaallit politikerit inuillu ataasiakkaat oqaatigisimasaat tamakkiisumiit allanngortillugit saqqumiunneqartartut takussaavoq.

Qanoq taamaaliortoqartiginersoq oqartussat alaatsinaattuut, taakkualu Naalagaaffeqatigiinni inuiaqatigiit oqartussaaqataanermik nunani allaniit sunniiniarsarisunut pakkersimaarinninniartut, PET ilisimatitsivoq.

Kalaallit Nunaanni oqartussat suleqatigilluinnarlugit taamaaliorput.

Kiunermik isertuussisunit nunanilu allaniit aningaasanik tapiissuteqarsinnaanissap inerteqqutaalernissaanik inatsisissatut siunnersuut Inatsisartuni amerlanerussuteqartut februaarip aallartinnerani nukinngullugu akueraat.

Inatsisissatut siunnersuut taanna “nunatta naalakkersuinikkut innarlitsaaliorneqarnissaanik siunertaqarluni” Naalakkersuisut kaammattuuteqarneratigut Inatsisartut marlunngornermi nukinngullugu suliaraat.

Kalaallit Nunaannili partiit assersuutigalugu Folketingimi partiinit suleqatigisaminnit aningaasanik suli taperneqarsinnaassaassasut, inatsisitaami allaqqavoq. Kalaallit Nunaanni partiit Danmarkimi oqartussanit aningaasanik taperneqarsinnaasut, inatsisitaami aamma erseqqissarneqarpoq.