Naleqqap Inatsisartut siulittaasuat avoqqaaraa: Paasissutissat allagaatineersut allaanerupput

Naleraq allagaatinik partiip siunnersuutinik qassinik ukiaanerani ataatsimiinnermi saqqummiussisinnaaneranut tunngasunik, Inatsisartut siulittaasoqarfianik isumaqatigiinngissuteqarnermini avammut maanna saqqummiussivoq.

Tamanna Inatsisartut siulittaasuata, Kim Kielsenip, suliamut tunngatillugu tusagassiuutinut sisamanngornermi nalunaaruteqarnerata kingorna pivoq.

Kim Kielsenip ilaasortat partiilluunniit siunnersuuteqarsinnaanerannut tunngatillugu killiliussaqannginnera nalunaarummini erseqqissarpaa.

Kim Kielsenip oqarnera naapertorlugu, siunnersuutinik Inatsisartut ataatsimiinnerminni suliarisinnaasaannit amerlanerujussuarnik nassiussisoqarsimavoq. 

Taamaattumik siunnersuutit pingaarnersioqqissaarneqartariaqarsimasut, taanna tusagassiuutinut nalunaarummi allappoq.  

Siulittaasulli oqarnera naapertorlugu, partiit namminneq pingaarnersiuipput.

- Taamaattumillu sorliit Inatsisartut maanna ataatsimiinnissaanni suliarineqarsinnaanersut aammalu sorliit Inatsisartut tullianik ataatsimiinnissaannut kinguartinneqarsinnaanersut partiit namminneq pingaarnersiortariaqarsimavaat, Kim Kielsen allappoq. 

Taassuma ataatsimiinnerup, ilaasortat, ataatsimiititat allaffissortullu eqqarsaatigalugit, illersorneqarsinnaasumik naammassineqarsinnaanissaata qulakkeerneqarneqarnissaa taamaallaat siunertarineqartoq, aammattaaq erseqqissaatigaa.

Naleraq: Allagaatit allamik ersersitsipput 

Naleqqalli tusagassiuutinut nalunaarut suliap ingerlarnganik eqqunngitsumik takutitsinerarpaa.

- Inatsisartut siulittaasuat allamik oqarpoq - uppernarsaatilli allamik takutitsipput, Naleqqap siulittaasua, Pele Broberg tusagassiuutinut nalunaarummi allappoq.

Naleqqap nalunaarutaa naapertorlugu, partii siulittaasoqarfimmit allakkamik aggustip 25-anni tigusaqarpoq, partiilu ukiaanerani ataatsimiinnissamut siunnersuusiaminik pingaarnersiueqquneqarpoq.

Allakkami allassimasut naapertorlugit, Naleqqamit siunnersutit 23-t  siulittaasoqarfimmit suliarineqarsinnaanerarneqarpalupput.

Naleqqap siunnersuutit 81-it tunniussimavai.

Sulittaasoqarfimmit partiinut allakkami, partiit siunnersuutaat, ilaatigut partiit qinersinermi angusaat aallaavigalugit tamatumalu kingorna issiatitaqalernerat aallavigalugit nalilersorneqassasut, allaqqavoq.

Siulittaasoqarfiullu tamanna ilutigalugu, d'Hondtip periaasia - qinigaaffiit agguataarneqarneranni atorneqartartoq, innersuussissutigaa.

Naleraq siunnersuutinik 23-nik toqqaajumanngilaq.

Pele Brobergip partiip siulittaasuata partiip Inatsisartuni ilaasortaasa siunnersuutitik pingaarnersiussagaat piumasaqaatiginianngikkaa septembarip aallaqqaataanni akissuteqarnermini allappaa.

- Inatsisartunut ilaasortat innuttaasut qinigaraat, siunnersuutillu sorliit oqaluuserineqassanersut partiip siulittaasuata aalajangigassarinngilaa, taanna allappoq.

. Naleqqap d'Hondtsip periusaa agguataarinermut atorneqarsinnaananilu ilaasortat siunnersuutaanik killilersuisoqarsinnaanngissoraa.

Partiip oqarnera naapertorlugu suleriaaseq allanngortinneqassappat tamanna Inatsisartut suleriaasaa malillugu pisariaqarlunilu Inatsisartunut saqqummiunneqartariaqarpoq.

Naleqqap siunnersuutinik 23-nik toqqarusunnginnera pissutigalugu partii tusagassiuutinut nalunaarut nutaaq naapertorlugu partiip siunnersuutaanit sorliit oqaluuserineqassanersut Siulittaasoqarfimmit aalajangerneqartut nalunaarfigineqarpoq.

Naleqqallu tamanna Kim Kielsenip suliamik tamanut nassuiaataanut akerliliisoraa.

Tatiginninnginnermik pilersitsisoq

Aaqqiagiinngissutigineqartoq Siulittaasoqarfimmi ilaasortap, Per Berthelsenip Facebookikkut saqqummiussaanut aamma tunngassuteqarpoq.

Naleqqap Siulittaasoqarfimmut allagaa (allagaq, Naleqqap septembarip aallaqqaataanni nassiussaa, aaqq.) naapertorlugu Berthelsenip siunnersuuteqartut siunnersuutit sorliit akuerneqarnerannik suli nalunaarfigineqanngitsut, ataatsimiinnissaq tulliuttoq 'ameralassutsimut tunnganani pitsaassutsimik' tunngaveqassasoq tamanut allappaa.

Taassuma, Naleqqap oqarnera naapertorlugu siunnersuutit qinersinermi taasisut amerlassusaat Inatsisartunilu ilaasortaatitarineqalersimasut malillugit ilaatigut aamma nalilersorneqassanerarpai.

Naleqqap allagarsiussaq partiip siunnersuutaanut 81-nut toqqaannartumik isornartorsiuinertut paasineqarsinnaasoraa, Siulittaasoqarfimmilu ilaasortap siunnersuuteqartut aalajangiinerit suli pissarsiarinngikkai tamanut nalunaaruteqarnera suliamik isumaginninnermut tatiginninnermut innarliinerusoralugu.

Partiip Jens Napaattuumit Pele Brobergimiillu siunnersuutit arlallit teknikkikkut misissorneqareersut aamma oqaatigaa.

Naleqqap oqarnera naapertorlugu siunnersuutit aaqqinneqareerpata ataatsimiinnermi oqaluuserisassanut kingusinnerusukkut ilanngunneqarsinnaasut nalunaarfigineqarpoq.

Naalli siunnersuutit aaqqinneqareeraluartut maanna itigartitsissutigineqaqqittut, Naleraq allappoq.

Naleqqap taamaammat partiip siunnersuutaata, piumasaqaatinik naammassinnittup UKA2026-mi oqaluuserineqarnissaa aalajangiusimavaa.

- Siulittaasoqarfik siunnersuutinik kinguartitsiniarpat, siunnersuuteqartunut ataasiakkaanut nammineq toqqaannartumik attaveqartariaqarpoq, aalajangiinerlu nammineq akisussaaffigalugu, Pele Broberg allappoq.