Paamiut kujataatungaani umimmannik suliniut iluatsilluartoq

Paamiut kujataatungaani umimmannik suliniut nutaaq iluatsilluarpoq. Umimmaat siorna nuutsinneqartut nunami nutaami naleqqussarluarsimasut, innuttaasunit malinnaaffigineqarput.

Allattoq Victoria Julie Schou

juulip 17-at 2025 14:07

Paamiut kujataatungaani umimmaat 19-it siorna nuunneqarmatali siullermeersumik takuniaasoqarmat paasinarsivoq umimmaat peqqissuusut ajunngitsullu, Kommuneqarfik Sermersooq tusagassiuutinut allappoq.

Umimmaat siammarsimapput

Umimmaat 2024-mi Ivittuuniit Iluilaarsuup eqqaanut nuunneqarput.

Misissuinerlu naapertorlugu umimmaat imungarsuaq tassa 50 kilometerit angullugit siammarsimapput.

Iluilaarsummiit Kangerluarsuup kujasinnerusortaata nalaa tikillugu umimmaat siammarsimapput.

- Umimmaat ingerlaarlutik nikeriarsimaqaat, kisianni maanna ataatsimoorlutik eqimattanngoqqittutut takusinnaavagut. Kusanaqaat, peqqipput ajunngeqalutillu – suli umimmaat 19-iupput, nuutinneqaramilli taamak amerlatigalutik, piniarnermik nakkutilliisoq Per Nukaaraq Hansen tusagassiuutinut nalunaarummi oqarpoq.

Aamma atuaruk Qiviulinnik nuussineq: Umimmaat 19-it Paamiunut nuunneqartut

Piaqqiulersimanngillat, kisianni tamatumap pisinnaaratarneranik ersiuteqarpoq.

-Suli piaqqiorsimanngitsut takusaanermi paasinarsivoq, kisianni marluk ilumittut takuneqarput ungasinngitsukkullu piaqqinissaat ilimanarpoq, piniarnermut nakkutilliisoq Per Nukaaraq Hansen oqarpoq.

Ineriartorneq innuttaasunit malinnaavigineqarluarpoq

Uumasoqatigiiaat assigiinngiiaarnerisa nukittorsarnissaat kiisalu siunissami piniarnissamut nammineerluni pilersorsinnaanissamut periarfissanik nutaanik pilersitsinissaq, Suliniummi pingaarnerusumik anguniagaavoq.

Suliniut innuttaasunit tapersersorneqarluartoq, Susanne Bisgaard Rasmussen, Kommuneqarfik Sermersuumi suliniummik aqutsisoq, tusagassiuutinut nalunaarummi oqarpoq.

-Paamiormiut eqqaminni nutaanik uumasoqalernera qanoq iluatigitigigaat paasillugu qiimmaallannarpoq. Uumasoqatigiiaanut taakkununnga malinnaalluartut amerlasuut uatsinnut nalunaaruteqartarput.

Ataatsimoorluta umimmaat paarilluassavagut amerliartornissaannullu pitsaanerpaanik atugassaqartitaanissaat pilersissallugu, Susanne Bisgaard Rasmussen, Kommuneqarfik Sermersuumi suliniummi aqutsisoq oqarpoq.

Umimmannik nuuttitsinissamik pilersaarutit 2017-imi saqqummiunneqaqqaarpoq, 2021-imilu qaqeqqinneqarluni. atsaalli aasaq kingulleq, Paamiut kujataani umimmaat 19-it imaatigut angallanneqarlutik nuutsinneqarput.

Umimmaat ukiuni tulliuttuni ingerlaavartumik malinnaavigineqartassapput aammalu misissorneqartarlutik, tassanilu peqqinneq, siammarsimaneri aammalu piaqqiortarneri ukkatarineqassapput

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.