‘Orsugiak - Grønlands hvide guld’ nersornaasigaasoq
Piviusulersaarusiaq 'Orsugiak - Grønlands Hvide Guld' Edinburgh Film Awardsimi innersuunneqartut akornanni piviusulersaarusiat pitsaanerpaattut nersornaasigaavoq.
Filmfestivali nittartakkamini taama allappoq.
Edinburgh Film Awards tassaavoq internetikkut filmfestivali mikisoq nunanit tamalaanit peqataaffigineqartoq, filmiliornissaminnut piginnaanillit nutaat namminersortullu filmiliaannik aningaasartuutikinnerusunik nersuiniarfik.
‘Orsugiak - Grønlands hvide guld' Danmarkip Ivittuuni orsugiammik piiaaffimmi, 1856-imiit 1987-imut piiaaffigineqartumi, aningaasatigut isertitaanut tunngavoq.
DR-ikkut siorna februaarip aallartinnerani aallakaatinneqaqqaarami ullut qulingiluat qaangiummata aallakaatinneqarunnaarpoq.
Tamanna, pingaartumik Danmarkimi, isornartorsiorneqarujussuareersorlu pivoq.
Edinburgh Film Awardsimit nersornaammik nutaamik pissarsinerup saniatigut, filmimi ilitsersuisut aappaa, Otto Rosing, Nuuk International Film Festivalimi “Kalaallit 2025-mi ilitsersuisutut” aamma nersornaaserneqarpoq.
Filmi Danmarkip tatisinerata kingunerisaanik takutinneqarunnaartoq
‘Orsugiak - Grønlands hvide guld’-ili oqallisigineqartuarsinnarpoq.
Filmimik Reykjavikimi Nordens Husimi takutitsineq danskit aallartitaannit tatineqarneq pissutigalugu marsimi unitsinneqarpoq.
Tamanna tusagassiuinermik suliaqartut atuagassiaannit Journalistenimit, takutitsinissaq taamaatitsiinnarnerlu pillugu paasissutissanik pissarsisimasumit oqaluttuarineqarpoq.
Danskit aallartitaqarfianneersut filmip takuteqqaarnissaanut aggersarneqareersullu, nunani avannarlerni ministerit siunnersuisoqatigiivisa qullersaat ambassadøriallu Karen Ellemann sianerfigineqarsimasoq paasinarsivoq:
- Oqaloqatigiinnitsinnut qujanaq, aaqqissuussinitsinnilu ajornartorsiummik maluginiaqqusininnut, Sabina Westerholm Islandimi Nordens Husimi pisortaq, danskit ambassadøriannut Erik Vilstrup Lorenzenimut allassimanera Journalistenip paasissutissarsiaanit paasinarsivoq:
- Suliaq suleqatikka aamma nunani avannarlerni ministerit siunnersuisoqatigiivilu oqallisigaarput. Karen Elleman tamanna pillugu ullumikkut ataviginnippoq, taassumallu filmi, eqqortumik tunngaveqalersiniarlugu oqimaaqatigiissaartumik oqallisigineqartinnagu takutinneqarsinnaanngitsoq erseqqissarpaa, pisortaq Journalistenip allaaserinninnera naapertorlugu, ambassadørimut mailikkut taama nangilluni allappoq.
Filmimi ilitsersuisoq, Otto Rosing, piviusulersaarutip tusagassiuutitigut taamarsuaq sammineqarnissaa naatsorsuutigisimanagu KNR-imut siusinnerusukkut oqaatigaa.
- Orsugiammut tunngatillugu Kalaallit Nunaanni ima oqaluttoqqarnissaa, 'Nalunngilarpummi', naatsorsuutigereerpara. Isumaqarpungalu Danmarkimi ima oqaluttoqassasoq, 'Tamanna uagut ilisimannginnatsigu', taanna oqarpoq:
- Piviusumili Danmarki oqarpoq, 'Tamanna ilumuunngilaq'. Tamannalu taamanili akiorparput.
