Oqaluttuarisaaneq pillugu ilisimatooq: Inuiaqatigiit pitsaasut Kalaallit Nunaata angorusuppaa

Kalaallit Nunaata Danmarkillu akornanni saammaasseqatigiinnissamik eqqarsaat, Danmarkip peqataaffigalugulu akuerisariaqarpaa. Saammaasseqatigiinnissaq pillugu ataatsimiititaliami ilaasortaq oqaluttuarisaanerlu pillugu ilisimatooq, Jens Heinrich aviisimi Berlingskemi taama allaaserisaqarpoq.

- Ataatsimiititaliamik pilersitsisoqarnerata ersersereerpaa, Kalaallit Nunaanni inuiaqatigiit akornanni pitsaanerusumik atugassaqartitaanisssaq angorusunneqartoq. Tamannalu Danmarkip akuerisariaqarpaa. Kalaallit Nunaannut ikiortituinnaq Danmarki imminut isigiunnaarluni, inuiaqatigiit marluk naligiinnerusumik atugassaqartitaanissaannik pieriarfissiinissaq eqqumaneruffigisariaqarpaa, taamaalilluni ataqatigiinneq, manna tikillugu inuiaqatigiit marluusut ilarpassuisa pitsaasutut isigisaat, ineriartortinneqarluni, Jens Heinrich allappoq.

Taassuma ilanngullu allakkamini oqaatigaa, saammaasseqatigiinnissamik ataatsimiititaliarsuarsuup siunertarinngimmagu, Kalaallit Nunaata maannamut ineriartortinneqarneranut Danmarki pisuutinneqartoq utoqqatsertoqarnissamillu kissaateqartoqanngitsoq.

- Nunap ataatsip saammaasseqatigiinnissamik pisariaqartitsinera nunap allap akuererusunnagu peqataaffigerusunngippagu, tamanna ajornartorsiutitut oqaatigineqarsinnaavoq. Tassami uani pineqarpoq, Danmarkip Kalaallit Nunaatalu ataatsimut oqaluttuarisaaneranni, Danmark nunasiaateqartutut inissisismasimammat taamaalilluni Kalaallit Nunaata ineriartorneranut maannalu inissisimaffigisaanut, Danmark attuumassuteqarluarmat - naak oqaluttuarisaaneq eqqarsaatigalugu, qanga Kalaallit Nunaanni landsrådet aalajangiisimaneri aamma tamassumunnga attuumassuteqarluaraluartut, Jens Heinrich allappoq.

Taassuma neriuutigaa, saammaasseqatigiinnissaq pillugu ataatsimiititaliarsuaq tassaalissasoq, inuiaqatigiit marluusut akornanni maannamut pigiliutiinnakkat ikilisinneqarnissaannik sulisussaq aamma inuiaqatigiit marluusut akornanni imminnut ataqqeqatigiinnissamik ujartuisoq.

- Taamaammat Danmark anguniakkamut suleqataasariaqarpoq, taamaattoqanngippammi naalagaaffeqatigiinnerup nalilersorneqarluarnissaanik suleqataanissamut periarfissaq annaasussaassammagu. Oqaluttuarisaaneq pillugu ilisimatooq, Jens Herinrich allakkamini naggasiivoq