Nivi Olsen: OL-imi peqataanikkut Nunarput nittarsaanneqarpoq
Tv-mi isiginnaartartut millionilikkaat nunarsuarmi tamaneersut ukiunerani OL malinnaaffigaat assiliisullu unammeqataasut OL-erfiusuni Milanomi Cortinamilu malersukaaginnavippaat. Maluginiarneqarluartut ilaat tassaapput Erfalasutsinnik aalaterissuteqartut.
Nunatta USA-llu akornanni aaqqiagiinnginneq nunani tamalaani maluginiarneqarpoq tamannalu sisoraaserlutik ooqattaasartartut Ukaleq Slettemarkip aamma Sondre Slettemarkip malugaat. Nunatsinneersuunerat kikkut tamarmik malugaat naak Danmark sinnerlugu unammeqataagaluartut. Danmark sinnerlugu unammeqataapput olympiadeqartarnerani nunani tamalaani ataatsimiititaliami Nunarput immikkut ilaasortaanngimmat.
Timersornermut Naalakkersuisoq Nivi Olsen ukiuunerani OL-ertuni najuuttoq aamma tulluusimaarpoq kalaallit peqataasut nunanit tamalaanit maluginiarneqarmata.
Nammineq piumassutsimik suliniartut tunngaviligaat
- Pissutissaqarluarpugut peqatigiiffinni namminneq piumassutsiminnik suliniartut tuiisigut pattalaassallugit. Taakku pissutaaqataalluinnarput Ukaleq aamma Sondre maanna OL-eqataammata erfalasorput nittarsaallugu naak qallunaat erfalasuat atorlugu unammeqataagaluarlutik, Nivi Olsen KNR-imut oqarpoq.
- Sisorartarfissuarmi isiginnaartorpassuit akornanni Nunarput eqqaaneqaqattaaginnavissoq maluginiarparput, tamannalu tulluusimaarutigaarput erfalasorpullu nuisatinneqaannavilluni, Nivi Olsen oqarpoq.
Taanna OL-erfiusumiippoq Kalaallit Nunaanni timersoqatigiit kattuffiannit GIF-imit aamma Elite Sport Greenlandimiit malinnaasut peqatigalugit, taakkulu pikkorinnerni unamminernut tapiissuteqartarput. Periarfissaq iluatsillugu Danmarks Idrætsforbundimeersut ataatsimeeqatigaat.
- Periarfissaq iluatsillugu ataatsimeeqateqartarpunga. Tassani saqqummiuttarparput erfalasorput atorlugu sassartitserusuttarluta. Anguniagarput pillugu matunik ammaaniarnissaq sulissutigaarput, Nivi Olsen oqarpoq.
Taamaasiorpoq nalunngikkaluarlugu OL-imi peqataasartut tassaasut nunat namminersortut.
- Sulissutigiuaannassavarput immikkut ittumik inissisimanitta paasitinniarnissaa, taamaattumik aqqutit eqqortut atorlugit sulinissaq pingaaruteqarpoq, Nivi Olsen oqarpoq.
