Nuup aqquserngini qimmit angalaaginnartut arlallit

Qimmiiteqaruit inuup kammaginerpaasaanik ukiup taarnerani paarsigit.

Nuup aqquserngini qimmit qitsuillu amerliartuinnartut angalaaginnarput. Taama Kommuneqarfik Sermersooq Facebookimi quppernermini allappoq, qimminillu nakkutilliisoq Tom Amtoft kommunip nittartagaani itisiliivoq:

- Maanna Atertami qimmeq qernertoq kajortorlu Nuummeersoq tiguneq ajulerpara, kisimiippoq qungasequteqaranilu. Arlaleriarluni kisimi angalaaginnartarpoq nerisassarsiorlunilu. Saloqaaq annilaangaqalunilu, taamaattumik tigujuminaappoq, oqarpoq.

Illit akisussaavutit

Qimmerlu taanna angalaaginnartuni kisiartaanngilaq. Kommuni taamaammat nittartakkamini qimmiitilinnut eqqaasitsissutigaa, 'qimmimik piginnittutut inatsisitigut pisussaatitaavutit qimmit paarissallugu, minnerunngitsumillu pingaaruteqarluinnarpoq ukiumi taartumi angalaaginnartittassanngikkitit'.

Qimmimik angalaaginnartumik takuguit kommunimut attaveqarnissat ajornanngippallu qimmimik aggeqqusinissat qimminik nakkutilliisup innersuussutigaa, pissutigalugu:

- Maanna nillertorujussuuvoq assullu quasalluni. Qimmeq annilaangasoq, kisimi sumi tamaani angalaaginnartoq angallannermut ulorianarlunilu ajoquserujussuarsinnaavoq. Aamma biilit qimmit aporaluarpagu ajoqusertunut akisussaatitaasinnaavutit, Tom Amtoft oqaluttuarpoq.