Nuummi suppaliorfik aningaasaliiffigineqartoq

NoINI angerlarsimaffeqanngitsunut, piitsunut kiserliortunullu nerisassanik kissartunik ukiut qulit kingulliit pingasunngornerit tamaasa sassaalliuteqartarpoq. Suppaliornermi ataatsimoorneq Frelsens Hærip sinaakkusigaraa, tassani atuisut 70-init ikinnerunngitsut nerisassaqartinneqartarlutik.

NoINI-mi siulittaasup Steven Arnfjordip aningaasat arfininngornermi tunissutigineqartut nuannaarutigilluinnarpai.

- Qujarutigeqaakka. Isumaginninnermi sullissinitsinnut nersuineruvoq, Steven Arnfjord oqarpoq.

Peqatigiiffiup nerisassanik kissartunik sassaalliuteqartarnermi saniatigut, Nuummi angerlarsimaffeqanngitsunut ataatsimooqatigiinnermik pitsaasumik suliniuteqartarpoq – tusaaneqarpiarnerlu ajortut tusaaneqarnissaannut oqaaseqartartuulluni.

Peqatigiiffiup suliaannut ilaatigut angerlarsimaffeqanngitsut peqataatinnerisigut pisarpoq. Suppaliorfik pingasunngornerit tamaasa ammaraangat, namminneq kajumissutsiminnik sulisut angerlarsimaffeqanngitsullu igaffimmi sanileriiaallutik piareersimasarput.

Peqatigiiffillu aningaasat tunniunneqartut atorlugit suliatik ingerlatiinnassavaat.

- Aningaasat tunniunneqartut atorlugit ataatsimoornermik pitsaasumik suliniuteqarnerput ingerlatiinnassavarput, Steven Arnfjord oqarpoq.