Nuummi politiit sap. ak. siuliani ulapittupilussuusimapput

Nuummi politiit sap. ak. siuliani ulapittupilussuusimapput. Nuummi politiit pisut 136-t nalunaarsuiffimminnut allattorsimavaat. Sap. ak. 7 toqutsineq pinngitsaaliinerlu minillugit, pinerluutinik tamanik naammattuugaqarfiuvoq.
Allattoq Peter Troelsen, Simon Uldum
februaarip 19-at 2013 06:27

Niuertarfinni tillinniarnerit 11-t, angerlarsimaffinni eqqissiviilliornerit 13-it aammalu ikiaroornartulerineq pillugu inatsimmik unioqqutitsinerit 12-it ulapputigineqarnerpaasimapput, aammali atortunik tillinniarnerit, kanngutsaatsuliornerit aserorterinerillu politiit sap. ak. siuliani ulapputigisimavaat.

Ajoraluartumillu politiit aammaarlutik ukiukitsumik atoqarteqartoqarsimaneranut iliuuseqartariaqarsimapput. Meeqqat annersaanikkut kinguaassiutitigulluunniit kanngutsaatsuliorfigeqqusaannginnerinik inuit paasinnissinnaannginnerat akuerineqarsinnaanngilluinnarpoq. Misissuinerummi nutaap takutippaa inuusuttut amerlavallaartut, arnaagunik angutaagunilluunniit, inersimasunit, pingaartumik ilaqutaasunit, kinguaassiutitigut kanngutsaatsuliorfigineqartarsimasut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq